ಪಾದಚಾರಿಗೆ ಕಾರು ಡಿಕ್ಕಿ

                          ದಿನಾಂಕ 21/07/2017ರಂದು ಕುಶಾಲನಗರ ಬಳಿಯ ಚಿಕ್ಕಬೆಟ್ಟಗೇರಿ ನಿವಾಸಿ ಶಿವಕುಮಾರ್‌ ಎಂಬವರು ಅವರ ತಂದೆ ತಿರುಮಲ ಸ್ವಾಮಿ ಎಂಬವರೊಂದಿಗೆ ಗುಡ್ಡೆಹೊಸೂರು ಬಳಿಯ ನರ್ಸರಿ ಬಳಿಯಿಂದ ಗುಡ್ಡೆಹೊಸೂರು ಜಂಕ್ಷನ್ ಕಡೆಗೆ ನಡೆದುಕೊಂಡು ಹೋಗುತ್ತಿರುವಾಗ ಮಡಿಕೇರಿ ಕಡೆಯಿಂದ ಕೆಎ-12-ಪಿ-1399ರ ಕಾರನ್ನು ಅದರ ಚಾಲಕ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ತಿರುಮಲ ಸ್ವಾಮಿಯವರಿಗೆ ಡಿಕ್ಕಿಪಡಿಸಿದ ಪರಿಣಾಮ ತಿರುಮಲ ಸ್ವಾಮಿಯವರಿಗೆ ಗಾಯಗಳಾಗಿ ಚಿಕಿತ್ಸೆಗಾಗಿ ಮಡಿಕೇರಿ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ ಸಂಚಾರಿ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಕಾಣೆಯಾದ ಮನುಷ್ಯನ ಶವ ಪತ್ತೆ

                          ದಿನಾಂಕ 19/07/2017ರಂದು ವಿರಾಜಪೇಟೆ ಬಳಿಯ ಹೆಗ್ಗಳ ನಿವಾಸಿ ವೈ.ಕೆ.ಸಣ್ಣ ಎಂಬವರು ನೆರೆಮನೆಯ ರಾಜು ಎಂಬವರ ದನಗಳನ್ನು ಕೊಟ್ಟಿಗೆಯಲ್ಲಿ ಕಟ್ಟಿ ಹಾಕಲು ಹೋಗಿದ್ದು ನಂತರ ಮರಳಿ ಮನೆಗೆ ಬಾರದೇ ಇದ್ದು ಎಲ್ಲಾ ಕಡೆಗಳಲ್ಲಿ ಹುಡುಕಿದರೂ ಪತ್ತೆಯಾಗಿರುವುದಿಲ್ಲವೆಂದು ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿತ್ತು. ನಂತರ ದಿನಾಂಕ 22/07/2017ರಂದು ಅದೇ ಗ್ರಾಮದ ಸ್ವಾಮಿಯಪ್ಪ ಎಸ್ಟೇಟಿನ ವ್ಯವಸ್ಥಾಕಪಕರು ಸಣ್ಣರವರ ಮಗಳು ಭೋಜಿಗೆ ದೂರವಾಣಿ ಕರೆ ಮಾಡಿ ಆಕೆಯ ತಂದೆ ಸಣ್ಣರವರ ಮೃತದೇಹವು ತೋಟದಲ್ಲಿ ಪತ್ತೆಯಾಗಿರುವುದಾಗಿ ತಿಳಿಸಿದ್ದುದಿನಾಂಕ 19/07/2017ರಂದು ವಿಪರೀತವಾಗಿ ಸುರಿಯುತ್ತಿದ್ದ ಸುರಿಯುತ್ತಿದ್ದ ಮಳೆಯಲ್ಲಿ ದನಗಳನ್ನು ಹುಡುಕಿ ಕಟ್ಟಿ ಹಾಕಲು ಹೋದ ಸಣ್ಣರವರು ಕಾಲು ಜಾರಿ ಬಿದ್ದು ಮೃತಪಟ್ಟಿರಬಹುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಪೊಲೀಸರು ಅಸ್ವಾಭಾವಿಕ ಮರಣದ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಕಾರು ಅವಘಢ

                       ದಿನಾಂಕ 22/07/2017ರಂದು ಮಹಾರಾಷ್ಟ್ರದ ಪುಣೆ ನಗರ ನಿವಾಸಿ ತರುಣ್ ಜೈನ್ ಎಂಬವರು ಅವರ ಸ್ನೇಹಿತರಾದ ಮನೀಷ್ ರಾವತ್, ಚಂಚಲ್ ಸಾದ್‌ ಮತ್ತು ಪ್ರಿಯಲ್ ಸಾದ್‌ ಎಂಬವರೊಂದಿಗೆ ಕೆಎ-03-ಎಇ-1011ರ ಕಾರಿನಲ್ಲಿ ಮಂಗಳೂರಿನಿಂದ ಮಡಿಕೇರಿ ಕಡೆಗೆ ಬರುತ್ತಿರುವಾಗ ಜೋಡುಪಾಲದ ಬಳಿ ಕಾರನ್ನು ಚಾಲಿಸುತ್ತಿದ್ದ ಮನೀಷ್‌ ರಾವತ್‌ರವರು ಕಾರನ್ನು ಅತಿ ವೇಗ ಮತ್ತು  ಅಜಾಗರೂಕತೆಯಿಂದ ಚಾಲಿಸಿದ ಪರಿಣಾಮ ಕಾರು ಅವರ ನಿಯಂತ್ರಣ ತಪ್ಪಿ ರಸ್ತೆ ಬದಿಯ ಕಲ್ಲಿಗೆ ಡಿಕ್ಕಿಯಾಗಿ ಹಾನಿಗೊಳಗಾಗಿರುವುದಾಗಿ  ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ತೋಟಕ್ಕೆ ಅಕ್ರಮ ಪ್ರವೇಶ

                         ದಿನಾಂಕ 21/07/2017ರಂದು ಕೆದಮುಳ್ಳೂರು ನಿವಾಸಿಗಳಾದ ಶಿವಪ್ಪ ಹಾಗೂ ಜೀವನ್ ಎಂಬವರು ಅದೇ ಗ್ರಾಮದ ನಿವಾಸಿ ಬಿ.ಎ.ಮತ್ತಮ್ಮ ಎಂಬವರ ಸ್ವಾಧೀನದಲ್ಲಿರುವ ತೋಟಕ್ಕೆ ಅಕ್ರಮ ಪ್ರವೇಶ ಮಾಡಿ ಕೆಲಸ ಮಾಡಿಸುತ್ತಿದ್ದುದನ್ನು ಕಂಡ ಮುತ್ತಮ್ಮನವರು ಆಕ್ಷೇಪಿಸಿದ ಕಾರಣಕ್ಕೆ ಶಿವಪ್ಪ ಹಾಗೂ ಜೀವನ್‌ರವರು ಮುತ್ತಮ್ಮನವರನ್ನು ಅಶ್ಲೀಲವಾಗಿ ನಿಂದಿಸಿದುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಮಹಿಳೆ  ಆತ್ಮಹತ್ಯೆ

                        ದಿನಾಂಕ 21/07/2017ರಂದು ಗೋಣಿಕೊಪ್ಪ ಬಳಿಯ ಕುಟ್ಟಂದಿ ನಿವಾಸಿ ಪಣಿ ಎರವರ ಶಾಂತಿ ಎಂಬಾಕೆಯು ಅವರು ಕೆಲಸ ಮಾಡುತ್ತಿರುವ ಕೊಲ್ಲೀರ ಬೋಪಣ್ಣ ಎಂಬವರ ತೋಟದಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು ಮೃತೆಯು ಮದುವೆಗೆ ಮೊದಲೂ ಸಹ ಆತ್ಮಹತ್ಯೆಗೆ ಯತ್ನಿಸಿದ್ದು ಯಾವುದೋ ಕಾರಣಕ್ಕೆ ಜುಗುಪ್ಸೆಗೊಂಡು ಆತ್ಮಹತ್ಯೆ ಮಾಡಿಕೊಂಡಿರಬಹುದಾಗಿ ನೀಡಿದ ದೂರಿನ ಮೇರೆಗೆ ಗೋಣಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಪರಸ್ಪರ ಕಾರು ಡಿಕ್ಕಿ

                    ದಿನಾಂಕ 21/07/2017ರಂದು ಗೋಣಿಕೊಪ್ಪ ನಿವಾಸಿ ಫಿಲಿಪೋಸ್ ಮ್ಯಾಥ್ಯೂ ಎಂಬವರು ಅವರ ಭಾವನವರಿಗೆ ಸೇರಿದ ಕೆಎ-03-ಎಂಇ-2471ರ ಕಾರನ್ನು ಪಡೆದುಕೊಂಡು ಅರುವತೊಕ್ಲು ನಿವಾಸಿ ರಿಜ್ವಾನ್ ಎಂಬವರನ್ನು ಕಾರಿನ ಚಾಲಕರಾಗಿ ಕರೆದುಕೊಂಡು ಮಡಿಕೇರಿಗೆ ಬಂದು ಮರಳಿ ಗೋಣಿಕೊಪ್ಪಕ್ಕೆ ಹೋಗುತ್ತಿರುವಾಗ ಕೈಕೇರಿ ಭಗವತಿ ದೇವಸ್ಥಾನದ ಬಳಿ ರಿಜ್ವಾನ್‌ರವರು ಕಾರನ್ನು ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿ ಎದುರುಗಡೆಯಿಂದ ಬರುತ್ತಿದ್ದ ಕೆಎ-05-ಎಂಎಫ್-4232ರ ಕಾರಿಗೆ ಡಿಕ್ಕಿಪಡಿಸಿದ ಪರಿಣಾಮ ಫಿಲಿಪೋಸ್‌ ಮ್ಯಾಥ್ಯೂ ಹಾಗೂ ರಿಜ್ವಾನ್‌ರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಗೋಣಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಅಕ್ರಮ ಜೂಜಾಟ, ಬಂಧನ

                        ದಿನಾಂಕ 21/07/2017ರಂದು ಸೋಮವಾರಪೇಟೆ ನಗರದ ಆಲೆಕಟ್ಟೆ ರಸ್ತೆಯ ಬಳಿ ಕೆಲವರು ಅಕ್ರಮವಾಗಿ ಜೂಜಾಡುತ್ತಿರುವುದಾಗಿ ದೊರೆತ ಖಚಿತ ಸುಳಿವಿನ ಮೇರೆಗೆ ಸೋಮವಾರಪೇಟೆ ಅಪರಾಧ ವಿಭಾಗದ ಪಿಎಸ್‌ಐ ಆರ್‌.ಮಂಚಯ್ಯನವರು ಸ್ಥಳಕ್ಕೆ ಧಾಳಿ ನಡೆಸಿ ಆಲಕಟ್ಟೆ ರಸ್ತೆಯ ರವಿ ಎಂಬವರ ಮನೆಯ ಬಳಿ ಅಕ್ರಮವಾಗಿ ಜೂಜಾಡುತ್ತಿದ್ದ ವಿನಯ, ಅನಿಲ್ ಸಿ.ಕೆ., ಲೋಕೇಶ, ಉಮೇಶ, ರವಿ ಹಾಗೂ ಶೇಖರ್ ಎಂಬವರನ್ನು ಬಂಧಿಸಿ ಜೂಜಾಟಕ್ಕೆ ಬಳಸಿದ್ದ ರೂ. 1530/- ಹಣವನ್ನು ವಶಪಡಿಸಿಕೊಂಡು ಸೋಮವಾರಪೇಟೆ ಠಾಣೆಯಲ್ಲಿ ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಬಸ್ಸಿಗೆ ಲಾರಿ ಡಿಕ್ಕಿ

                        ದಿನಾಂಕ 21/07/2017ರಂದು ಕೆಎಸ್‌ಆರ್‌ಟಿಸಿ ಸಂಸ್ಥೆಯ ಹುಣಸೂರು ಘಟಕದಲ್ಲಿ ಚಾಲಕರಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಸಂಗಣ್ಣ ಅವಂತಿ ಎಂಬವರು ಕೆಎ-09-ಎಫ್-5151ರ ಬಸ್ಸನ್ನು ಚಾಲಿಸಿಕೊಂಡು ಮಡಿಕೇರಿಯಿಂದ ಮೈಸೂರಿಗೆ ಹೋಗುತ್ತಿರುವಾಗ ಕೆದಕಲ್ ಗ್ರಾಮದ ಬಳಿ ಹಿಂದಿನಿಂದ ಕೆಎ-20-ಎ-7807ರ ಲಾರಿಯನ್ನು ಅದರ ಚಾಲಕ ಸತೀಶ್‌ ಎಂಬಾತ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಬಸ್ಸಿನ ಹಿಂಭಾಗಕ್ಕೆ ಡಿಕ್ಕಿಪಡಿಸಿದ ಪರಿಣಾಮ ಬಸ್ಸಿಗೆ ಹಾನಿಯುಂಟಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಸುಂಟಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಬೈಕು ಕಳವು

                           ದಿನಾಂಕ 16/07/2017ರಂದು ಕುಶಾಲನಗರದ ಬೈಪಾಸ್‌ ರಸ್ತೆ ನಿವಾಸಿ ದಿಲೀಪ್‌ ಕುಮಾರ್‌ ಎಂಬವರು ಅವರ ಮನೆಯ ಮುಂದೆ ಅವರ ಕೆಎ-12-ಕ್ಯು-6500ರ ಮೋಟಾರು ಸೈಕಲನ್ನು ನಿಲ್ಲಿಸಿದ್ದು ದಿನಾಂಕ 17/07/2017ರಂದು ಎಂದಿನಂತೆ ಕೆಲಸಕ್ಕೆ ಹೋಗುವ ಸಲುವಾಗಿ ನೋಡಿದಾಗ ಬೈಕು ಕಾಣೆಯಾಗಿದ್ದು ಯಾರೋ ಕಳ್ಳರು ಕಳವು ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ ಪಟ್ಟಣ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

 ಜೀಪಿಗೆ ಆಟೋ ರಿಕ್ಷಾ ಡಿಕ್ಕಿ ಇಬ್ಬರಿಗೆ ಗಾಯ:

    ಆಟೋ ರಿಕ್ಷಾವೊಂದು ಜೀಪಿಗೆ ಡಿಕ್ಕಿಯಾಗಿ ಚಾಲಕರಿಬ್ಬರೂ ಗಾಯಗೊಂಡ ಘಟನೆ ಶ್ರೀಮಂಗಲ ಠಾಣಾ ವ್ಯಾಪ್ತಿಯ ಹುದಿಕೇರಿ ಗ್ರಾಮದಲ್ಲಿ ನಡೆದಿದೆ. ದಿನಾಂಕ 18-7-2017 ರಂದು ಫಿರ್ಯಾದಿ ಅಜ್ಜಮಾಡ ಸೋಮಣ್ಣ ಎಂಬವರು ತಮ್ಮ ಬಾಪ್ತು ಜೀಪಿನಲ್ಲಿ ಗೋಣಿಕೊಪ್ಪದ ಕಡೆಗೆ ಹೋಗುತ್ತಿದ್ದಾಗ ಸಮಯ ಸಂಜೆ 7-00 ಗಂಟೆಯ ಸಮಯದಲ್ಲಿ ಹುದಿಕೇರಿಯ 7ನೇ ಮೈಲಿನಲ್ಲಿ ತಲುಪಿದಾಗ ಎದುರುಗಡೆಯಿಂದ ಬಂದ ಆಟೋ ರಿಕ್ಷಾ ಡಿಕ್ಕಿಯಾಗಿದ್ದು, ಪರಿಣಾಮ ಜೀಪನ್ನು ಚಲಾಯಿಸುತ್ತಿದ್ದ ಅಜ್ಜಮಾಡ ಸೋಮಣ್ಣನವರು ಗಾಯಗೊಂಡಿದ್ದು,ಆಟೋ ರಿಕ್ಷಾ ಚಾಲಕನಿಗೆ ಸಹ ಗಾಯಗಳಾಗಿದ್ದು ಅಲ್ಲದೆ ಎರಡೂ ವಾಹನಗಳು ಜಖಂ ಗೊಂಡಿದ್ದು, ಸೋಮಣ್ಣನವರ ದೂರಿನ ಮೇರೆಗೆ ಶ್ರೀಮಂಗಲ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮಿನಿ ವ್ಯಾನ್ ಗೆ ಕಾರು ಡಿಕ್ಕಿ:

      ಸುಂಟಿಕೊಪ್ಪ ಪೊಲೀಸ್ ಠಾಣಾ ಸರಹದ್ದಿನ ಹುದುಗುರು ಗ್ರಾಮದ ನಿವಾಸಿ ಬಿದ್ದಪ್ಪ ಎಂಬವರು ದಿನಾಂಕ 20.07.2017 ರಂದು ತಮ್ಮ ಬಾಪ್ತು ಟೂರ್ ವ್ಯಾನ್ ಕೆಎ 12 ಎ 7510 ರ ಮ್ಯಾಗ್ಸಿಮೋ ಮಿನಿ ವ್ಯಾನ್ ನ್ನು ಬಾಡಿಗೆ ಸಂಬಂಧ ಬೆಳಗ್ಗೆ ಮಡಿಕೆರಿಯಿಂದ ಟೂರ್ ಜನರನ್ನು ಕರೆದುಕೊಂಡು ಕುಶಾಲನಗರಕ್ಕೆ ಬರುತ್ತಿರುವಾಗ ಸುಂಟಿಕೊಪ್ಪದ ಬಾಳೆಕಾಡು ಎಸ್ಟೇಟ್ ತಲುಪುವಾಗ್ಗೆ ಸಮಯ 08.00 ಗಂಟೆಗೆ ಎದುರುಗಡೆಯಿಂದ ಅಂದರೆ ಕುಶಾಲನಗರದ ಕಡೆಯಿಂದ ಬಂದ ಕೆಎ 05 ಎಜಿ 0599 ರ ಗ್ರ್ಯಾಂಡ್ ಐ10 ಕಾರ್ ನ್ನು ಅದರ ಚಾಲಕ ವಿಶಾಲ್ ಅಗ್ನಿವೇಶ್ ರವರು ಅತಿವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಬಿದ್ದಪ್ಪನವರು ಚಾಲಿಸುತ್ತಿದ್ದ ಮ್ಯಾಗ್ಸಿಮೋ ಮಿನಿ ವ್ಯಾನಿಗೆ ಡಿಕ್ಕಿ ಪಡಿಸಿದ ಪರಿಣಾಮ ವ್ಯಾನ್ ನಲ್ಲಿದ್ದ ರಾಣಿ,ರಮೇಶ್ ಹಾಗೂ ಲಕ್ಷ್ಮಣ್ ಎಂಬುವವರಿಗೆ ಗಾಯಗಳಾಗಿದ್ದು ಈ ಸಂಬಂಧ ಸುಂಟಿಕೊಪ್ಪ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ಮರಗಳ ಕಳವು ಪ್ರಕರಣ ದಾಖಲು:

     ವ್ಯಕ್ತಿಯೊಬ್ಬರ ಜಾಗದಿಂದ ಮರಗಳನ್ನು ಕಡಿದು ಕಳ್ಳತನ ಮಾಡಿದ ಘಟನೆ ಹಚ್ಚಿನಾಡು ಗ್ರಾಮದಲ್ಲಿ ನಡೆದಿದೆ. ದಿನಾಂಕ 18-5-2016ರ ಹಿಂದೆ ಪಿರ್ಯಾದಿ ಕುಶಾಲನಗರ ನಿವಾಸಿ ಡಯಾನ ಹಿಂಪನ್ ಸಬಾಸ್ಟೀನ್ ಎಂಬವರ ಬಾಪ್ತು ಹಚ್ಚಿನಾಡು ಗ್ರಾಮದಲ್ಲಿರುವ ಜಾಗದಲ್ಲಿದ್ದ ಅಂದಾಜು 30 ದೊಡ್ಡ ದೊಡ್ಡ ಮರಗಳನ್ನು ಮಿನ್ನಂಡ ಎನ್ ದೇವಯ್ಯ, ಮಿನ್ನಂಡ ಎನ್ ತಿಮಯ್ಯ ಹಾಗೂ ಮಿನ್ನಂಡ ಉತ್ತಯ್ಯರವರುಗಳು ಕಡಿದು ಕೊಂಡು ಹೋಗಿರುತ್ತಾರೆಂದು ಸಂಶಯವಿರುವುದಾಗಿ ನೀಡಿದ ದೂರಿನ ಮೇರೆಗೆ ಸೋಮವಾರಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

 ನೌಕರಿ ನೀಡುವುದಾಗಿ ವಂಚನೆ:

     ಕುಶಾಲನಗರದ ಗುಮ್ಮನಕೊಲ್ಲಿ ನಿವಾಸಿ ಎಂ.ಪಿ. ಮಹೇಶ್ ಎಂಬವರು 2015ನೇ ಸಾಲಿನಲ್ಲಿ ಐಟಿಬಿಪಿ ಸಂಸ್ಥೆಯೊಂದರಲ್ಲಿ ಫಿಟ್ಟರ್ ಕೆಲಸಕ್ಕಾಗಿ ಅರ್ಜಿಯನ್ನು ಸಲ್ಲಿಸಿದ್ದು, 2017ನೇ ಸಾಲಿನಲ್ಲಿ ಸದರಿ ಹುದ್ದೆಗೆ ಆಯ್ಕೆಯಾಗಿರುವುದಾಗಿ ಐಟಿಬಿಪಿ ಪೋರ್ಸ್ ಲೆಟರ್ ಹೆಡ್ ನಲ್ಲಿ ಬರೆದಿರುವ ಪತ್ರವನ್ನು ಕಳುಹಿಸಿ, ನಂತರ ದೂರವಾಣಿ ಮೂಲಕ ವಿಚಾರಿಸಿಲಾಗಿ ರೂ.25,000/- ಗಳನ್ನು ಮುಂಗಡವಾಗಿ ಜಮಾ ಮಾಡಲು ಸೂಚಿಸಿದ್ದು, ಯಾರೋ ವ್ಯಕ್ತಿ ಐಟಿಬಿಪಿ ಇಲಾಖೆಯ ಲೆಟರ್ ಪ್ಯಾಡ್ ನ್ನು ದುರುಪಯೋಗಪಡಿಸಿಕೊಂಡು ಪತ್ರ ವ್ಯವಹಾರ ನಡೆಸಿರುತ್ತಾರೆಂದು ಶ್ರೀ ಕೃಷ್ಣ ಚೌದರಿ ಎಂಬವರು ನೀಡಿದ ದೂರಿನ ಮೇರೆಗೆ ಕುಶಾಲನಗರ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.


ನೇಣು ಬಿಗಿದುಕೊಂಡು ವ್ಯಕ್ತಿ ಆತ್ಮಹತ್ಯೆ:

     ಮಡಿಕೇರಿ ನಗರ ಠಾಣಾ ಸರಹದ್ದಿನ ಭಗವತಿ ನಗರದ ನಿವಾಸಿ ಕೆ.ಇ. ಮುರುಗೇಶ್ ಎಂಬವರು ದಿನಾಂಕ 19-7-2017 ರಂದು ರಾತ್ರಿ ತಮ್ಮ ಮನೆಯಲ್ಲಿ ಕುತ್ತಿಗೆಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು, ಮಡಿಕೇರಿ ನಗರ ಠಾಣೆಯಲ್ಲಿ ಮುರುಗೇಶ್ ರವರ ಪತ್ನಿ ಶ್ರೀಮತಿ ಉಮಾ ಮಹೇಶ್ವರಿ ಎಂಬವರು ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಅಕ್ರಮ ಮದ್ಯ ಮಾರಾಟ:

     ವ್ಯಕ್ತಿಯೊಬ್ಬರು ಅಕ್ರಮವಾಗಿ ತಮ್ಮ ಮನೆಯಲ್ಲಿ ಮದ್ಯ ಮಾರಾಟ ಮಾಡುತ್ತಿದ್ದುದನ್ನು ಪತ್ತೆ ಹಚ್ಚಿದ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಮೇಕೇರಿ ಗ್ರಾಮದ ನಿವಾಸಿ ಧರ್ಮ ಎಂಬವರು ತಮ್ಮ ಮನೆಯಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದುದನ್ನು ಪತ್ತೆ ಹಚ್ಚಿದ ಮಡಿಕೇರಿ ಗ್ರಾಮಾಂತರ ಠಾಣಾಧಿಕಾರಿ ಶಿವಪ್ರಕಾಶ್ ಮತ್ತು ಸಿಬ್ಬಂದಿಯವರು ಆರೋಪಿಯಿಂದ 90 .ಎಂ.ಎಲ್.ನ 27 ಪ್ಯಾಕೇಟ್ ಗಳನ್ನು ವಶಪಡಿಸಿಕೊಂಡು ಆರೋಪಿ ವಿರುದ್ಧ ಪ್ರಕರಣ ದಾಖಲಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ. 

ಲಾರಿ ತಡೆದು ಹಣ ಸುಲಿಗೆ

                      ದಿನಾಂಕ 18/07/2017ರಂದು ಮಂಡ್ಯ ಜಿಲ್ಲೆಯ ಮಳವಳ್ಳಿ ನಿವಾಸಿ ಬಿ.ಪಿ.ಮಂಜು ಎಂಬವರು ಕೆಎ-01-ಎಡಿ-3241ರ ಲಾರಿಯಲ್ಲಿ ನಂಜನಗೂಡಿನಿಂದ ಮಂಗಳೂರಿನ ಬೈಕಂಪಾಡಿಗೆ ಸ್ನೇಹಿತ ಬಸವರಾಜು ಎಂಬವರೊಂದಿಗೆ ಹೋಗುತ್ತಿರುವಾಗ ರಾತ್ರಿ ವೇಳೆ ಕುಶಾಲನಗರ ಬಳಿಯ ಆನೆಕಾಡು ಬಳಿಯ ಹೋಟೆಲ್ ಒಂದರಲ್ಲಿ ಊಟ ಮುಗಿಸಿ ಲಾರಿಯಲ್ಲಿ ಮಲಗಿಕೊಂಡಿರುವಾಗ ನಡು ರಾತ್ರಿ ಸುಮಾರು 1:45 ಗಂಟೆಗೆ ಒಂದು ಟೊಯೋಟಾ ಈಟಿಯೋಸ್‌ ಕಾರಿನಲ್ಲಿ 23-25 ವರ್ಷ ಪ್ರಾಯದ ಸುಮಾರು ನಾಲ್ಕು ಜನರು ಬಂದು ಲಾರಿಯ ಮುಂದೆ ಕಾರು ನಿಲ್ಲಿಸಿ ಲಾರಿಯ ಬಾಗಿಲನ್ನು ತೆರೆದು ಒಳ ನುಗ್ಗಿ  ಸ್ಕ್ರೂ ಡ್ರೈವರ್‌ನಿಂದ ಮಂಜುರವರ  ಕುತ್ತಿಗೆಗೆ ಚುಚ್ಚಿ ಗಾಯಗೊಳಿಸಿ ಮಂಜುರವರ ಬಳಿ ಇದ್ದ ರೂ.5,000/- ನಗದು, ಒಂದು ಮೊಬೈಲ್‌ ಫೋನ್, ಸೊನಾಟಾ ವಾಚ್‌ ಹಾಗೂ ಮಂಜುರವರ ಸ್ನೇಹಿತ ಬಸವರಾಜುರವರ ಬಳಿ ಇದ್ದ ರೂ.200/-ನ್ನು ಸುಲಿಗೆ ಮಾಡಿಕೊಂಡು ಹೋಗಿದ್ದು ಕುಶಾಲನಗರ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಪಾದಚಾರಿಗೆ ಬೈಕ್ ಡಿಕ್ಕಿ

                    ದಿನಾಂಕ 18/07/2017ರಂದು ಕುಶಾಲನಗರ ಬಳಿಯ ತೊರೆನೂರು ನಿವಾಸಿ ಮಹೇಶ್‌ ಕುಮಾರ್ ಎಂಬವರು ಕುಶಾಲನಗರದ ಮೆಡ್‌ಪ್ಲಸ್ ಔಷಧಿ ಅಂಗಡಿಯ ಬಳಿ ಅವರ ಬೈಕ್‌ ನಿಲ್ಲಿಸಿ ಔಷಧಿ ಖರೀದಿಸುವ ಸಲುವಾಗಿ ಅಂಗಡಿಗೆ ಹೋಗುತ್ತಿರುವಾಗ ಮೈಸೂರು ಕಡೆಯಿಂದ ಕೆಎ-12-ಆರ್‌-2754ರ ಬೈಕನ್ನು ಅದರ ಚಾಲಕ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಮಹೇಶ್‌ ಕುಮಾರ್‌ವರಿಗೆ ಡಿಕ್ಕಿಪಡಿಸಿದ ಪರಿಣಾಮ ಮಹೇಶ್‌ ಕುಮಾರ್‌ರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ  ಸಂಚಾರಿ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಹಳೆ  ವೈಷಮ್ಯ ಹಲ್ಲೆ

                       ದಿನಾಂಕ 19/07/2017ರಂದು ವಿರಾಜಪೇಟೆ ಬಳಿಯ ಹಾತೂರು ನಿವಾಸಿ ಕೊಕ್ಕಂಡ ಬಿ.ಅಪ್ಪಣ್ಣ ಎಂಬ ವಕೀಲರು ಅವರ ಕಕ್ಷಿದಾರರೊಬ್ಬರ ಮೇಲೆ ದಾಖಲಾದ ಪ್ರಕರಣದ ಬಗ್ಗೆ ತಿಳಿಯಲು ಕುಪ್ಪಂಡ ರಮೇಶ್‌ ಎಂಬವರೊಂದಿಗೆ ವಿರಾಜಪೇಟೆ ಗ್ರಾಮಾಂತರ ಠಾಣೆಗೆ ಹೋಗುತ್ತಿರುವಾಗ ಅಮ್ಮತ್ತಿ ನಿವಾಸಿ ಚಿಟ್ಟಿಯಪ್ಪ ಎಂಬವರು ಪ್ರಕರಣವೊಂದರ ಬಗ್ಗೆ ಜಗಳವಾಡಿ ಅಪ್ಪಣ್ಣರವರ ಮೇಲೆ ಹಲ್ಲೆ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಪತ್ರಿಕಾ ಪ್ರಕಟಣೆ:

        ಪೊಲೀಸ್ ಸಬ್ ಇನ್ಸ್ ಪೆಕ್ಟರ್  ಸಿವಿಲ್ ಮತ್ತು ರಾಜ್ಯ ಗುಪ್ತ ವಾರ್ತೆ ಹುದ್ದೆಗಳ ನೇಮಕಾತಿಗಾಗಿ ಹಾಸನ, ಚಾಮರಾಜನಗರ, ಮಂಡ್ಯ, ಕೊಡಗು, ಮೈಸೂರು ಜಿಲ್ಲೆಯ ಅಭ್ಯರ್ಥಿಗಳಿಗೆ ಸಿ.ಎ.ಆರ್. ಮೈದಾನ, ಮೈಸೂರು ಇಲ್ಲಿ ದಿನಾಂಕ 24.7.2017ರಂದು ನಿಗದಿಪಡಿಸಲಾಗಿದ್ದ ಸಹಿಷ್ಣುತೆ ಮತ್ತು ದೇಹದಾಢ್ರ್ಯತೆ ಪರೀಕ್ಷೆಗಳು   ದಿನಾಂಕ 31.7.2017ಕ್ಕೆ  ಮುಂದೂಡಲಾಗಿದ್ದು, ಸಂಬಂಧಿಸಿದ ಅಭ್ಯರ್ಥಿಗಳು    ವೆಬ್ ಸೈಟ್ ನಲ್ಲಿ ಪ್ರವೇಶ ಪತ್ರಗಳನ್ನು (Call Letter) ಡೌನ್ಲೋಡ್ ಮಾಡಿಕೊಳ್ಳಬಹುದಾಗಿದೆ ಎಂದು  ಪೊಲೀಸ್ ಅಧೀಕ್ಷಕರು, ಕೊಡಗು ಜಿಲ್ಲೆ ರವರು ತಿಳಿಸಿರುತ್ತಾರೆ. 

------           ------      ------          -----            -----          -----            -----            -----         -----        -----        -----     --

ಕ್ಷುಲ್ಲಕ ಕಾರಣಕ್ಕೆ ಹಲ್ಲೆ

            ಕ್ಷುಲ್ಲಕ ಕಾರಣಕ್ಕೆ ವ್ಯಕ್ತಿಯ ಮೇಲೆ ಹಲ್ಲೆ ನಡೆಸಿದ ಘಟನೆ ಮಡಿಕೇರಿ ತಾಲೂಕಿನ ಸಣ್ಣಪುಲಿಕೋಟು ಎಂಬಲ್ಲಿ ನಡೆದಿದೆ. ಸಣ್ಣಪುಲಿಕೋಟು ಗ್ರಾಮದ ನಿವಾಸಿ ಪಪ್ಪುವೇಣಿ ಎಂಬುವವರು ದಿನಾಂಕ 17-7-2017ರಂದು ತಮ್ಮ ಮನೆಯಲ್ಲಿರುವಾಗ ಶ್ಯಾಮ್ ಎಂಬುವವರು ಮನೆಗೆ ಬಂದು ಐನ್ ಮನೆಯ ದೇವರ ಕೋಣೆಗೆ ಚಪ್ಪಲಿ ಹಾಕುವ ವಿಚಾರದಲ್ಲಿ ಜಗಳ ತೆಗೆದು ಹಲ್ಲೆ ನಡೆಸಿದ್ದು ಈ ಬಗ್ಗೆ ಪಪ್ಪುವೇಣಿಯವರು ನೀಡಿದ ದೂರಿನ ಮೇರೆಗೆ ಭಾಗಮಂಡಲ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಬ್ಯಾಂಕಿನಿಂದ ಹಣ ತೆಗೆದು ವಂಚನೆ

           ಮಡಿಕೇರಿ ನಗರದ ಚೈನ್ ಗೇಟ್  ನಿವಾಸಿ  ಶ್ರೀಮತಿ ದ್ರೌಪದಿ ಎಂಬುವವರು ಮಡಿಕೇರಿಯ ಎಸ್.ಬಿ.ಐ ಬ್ಯಾಂಕಿನಲ್ಲಿ ಖಾತೆಯನ್ನು ಹೊಂದಿದ್ದು, ದಿನಾಂಕ 13-07-2017 ರಂದು ರಾತ್ರಿ 8-00 ಗಂಟೆಯ ಸಮಯದಲ್ಲಿ ಯಾರೋ ಅಪರಿಚಿತ ವ್ಯಕ್ತಿ 7480943815 ರ ಸಂಖ್ಯೆಯಿಂದ ಕರೆ ಮಾಡಿ ಬ್ಯಾಂಕಿನಿಂದ  ಮಾತನಾಡುತ್ತಿದ್ದೇವೆಂದು ಹೇಳಿ  ನಿಮ್ಮ ಎಟಿಎಂ ಕಾರ್ಡ್ ಲಾಕ್  ಆಗಿರುವುದಾಗಿ ತಿಳಿಸಿ, ಅದನ್ನು ಸರಿಪಡಿಸುತ್ತೇನೆ  ನಿಮ್ಮ ಮೊಬೈಲ್ ಸಂಖ್ಯೆ ಗೆ  ಸಂದೇಶ ಬರುತ್ತದೆ ಅದರದಲ್ಲಿರುವ 6 ಸಂಖ್ಯೆಗಳನ್ನು ಹೇಳಿ ಎಂದು ಹೇಳಿದ ಮೇರೆಗೆ  ನಾಲ್ಕು ಬಾರಿ ಬಂದ ಸಂದೇಶವನ್ನು ಅವರಿಗೆ ತಿಳಿಸಿದ್ದು, ನಂತರ ದಿನಾಂಕ 15-07-2017 ರಂದು ದ್ರೌಪದಿಯವರು ಎ.ಟಿ.ಎಂ ನಲ್ಲಿ ಹಣ ಡ್ರಾ ಮಾಡಲು ಹೋದಾಗ ಖಾತೆಯಲ್ಲಿ ಕೇವಲ 111 ರೂ ಮಾತ್ರ ಇದ್ದು ಉಳಿದ 15000 ರೂ ಹಣವನ್ನು ದೂರವಾಣಿ ಕರೆ ಮಾಡಿದ ವ್ಯಕ್ತಿಯು ಮೋಸದಿಂದ ಡ್ರಾ ಮಾಡಿಕೊಂಡಿದ್ದು ಈ ಬಗ್ಗೆ  ಶ್ರೀಮತಿ ದ್ರೌಪದಿಯವರು ನೀಡಿದ ದೂರಿನ ಮೇರೆಗೆ ಮಡಿಕೇರಿ ನಗರದಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಅಪಘಾತ ಪ್ರಕರಣ

         ದಿನಾಂಕ 18-07-2017 ರಂದು ಸೋಮವಾರಪೇಟೆ ತಾಲೂಕಿನ ಹಾನಗಲ್ಲು ಗ್ರಾಮದ ನಿವಾಸಿ ಸಂಜೀವ ಎಂಬುವವರು ತಮ್ಮ ಮೋಟಾರು ಸೈಕಲಿನಲ್ಲಿ ಸೋಮವಾರಪೇಟೆಗೆ ಹೋಗುತ್ತಿರುವಾಗ ಹಾನಗಲ್ಲು ಗ್ರಾಮದ ಗಣೇಶರವರ ಅಂಗಡಿಯ ಮುಂದಿನ ರಸ್ತೆಯಲ್ಲಿ ಎದುರುಗಡೆಯಿಂದ  ಮಾರುತಿ ವ್ಯಾನನ್ನು ಅದರ ಚಾಲಕ ಅಜಾಗರೂಕತೆಯಿಂದ ಚಾಲನೆ ಮಾಡಿಕೊಂಡು ಹೋಗಿ ಮೋಟಾರು ಸೈಕಲಿಗೆ  ಡಿಕ್ಕಿ ಪಡಿಸಿದ್ದು ಸಂಜೀವರವರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು ಈ ಬಗ್ಗೆ  ಸೋಮವಾರಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ವ್ಯಕ್ತಿಯ ಆತ್ಮಹತ್ಯೆ

        ವ್ಯಕ್ತಿಯೊಬ್ಬರು ನೇಣುಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ವಿರಾಜಪೇಟೆ ತಾಲೂಕಿನ ನಿಟ್ಟೂರು ಎಂಬಲ್ಲಿ ವರದಿಯಾಗಿದೆ. ನಿಟ್ಟೂರು ಗ್ರಾಮದ  ರಾಜರವರ ಲೈನ್ ಮನೆಯಲ್ಲಿ ವಾಸವಿರುವ ಪಣಿಯರವರ ಕುಳಿಯ ಎಂಬುವವರಿಗೆ ವಿಪರೀತ ಮದ್ಯಪಾನ ಮಾಡುವ ಅಭ್ಯಾಸವಿದ್ದು,  ದಿನಾಂಕ  17-07-2017 ರಂದು ಕೆಲಸಕ್ಕೆ ರಜೆ ಇದ್ದುದ್ದರಿಂದ ಮನೆಯಲ್ಲೇ ಇದ್ದು ಮದ್ಯಪಾನ ಮಾಡಿದ್ದು  ರಾತ್ರಿ ಸಮಯದಲ್ಲಿ ಲೈನ್ ಮನೆಯ ಹಿಂಬದಿಯಲ್ಲಿ ಕೌಕೋಲಿಗಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು ಈ ಬಗ್ಗೆ ಕುಳಿಯರವರ  ಅಣ್ಣ ಕಾಳರವರು ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ವ್ಯಕ್ತಿಯ ಮೇಲೆ ಹಲ್ಲೆ

                           ದಿನಾಂಕ 16/07/2017ರಂದು ಶನಿವಾರಸಂತೆ ಬಳಿಯ ದೊಡ್ಡಳ್ಳಿ ಗ್ರಾಮದ ನಿವಾಸಿ ಡಿ.ಆರ್.ಮಹೇಶ ಎಂಬವರು ಹಾರೆಹೊಸೂರು ನಿವಾಸಿ ವಿಜಯ ಎಂಬವರಿಗೆ  ಹಣವನ್ನು ನೀಡಲು ಹೋಗುತ್ತಿರುವಾಗ ಲೋಕೇಶ ಮತ್ತು ಚಂದ್ರಶೇಖರ ಎಂಬವರು ಮಹೇಶ್‌ರವರನ್ನು ತಡೆದು ಯಾವುದೋ ಕಾರಣಕ್ಕೆ ಜಗಳವಾಡಿ ಕೈಯಿಂದ ಹೊಡೆದು ಹಲ್ಲೆ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಶನಿವಾರಸಂತೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಮರ ಕಳವು 

                          ದಿನಾಂಕ 15/07/2017ರಂದು ಶನಿವಾರಸಂತೆ ಬಳಿಯ ದೊಡ್ಡಳ್ಳಿ ನಿವಾಸಿ ರುದ್ರಯ್ಯ ಎಂಬವರು ಮನೆಯಲ್ಲಿಲ್ಲದ ಸಮಯದಲ್ಲಿ ಅದೇ ಗ್ರಾಮದ ನಿವಾಸಿಗಳಾದ ಗಿರೀಶ, ಯತೀಶ, ಚಂದ್ರಶೇಖರ ಮತ್ತು ತೋಟಪ್ಪ ಎಂಬವರು ರುದ್ರಯ್ಯನವರ ತೋಟದಿಂದ ಐದು ಸಿಲ್ವರ್ ಮರಗಳು ಹಾಗೂ ಒಂದು ಮಾವಿನ ಮರವನ್ನು ಕಡಿದು ಸಾಗಿಸಿದ್ದು ರುದ್ರಯ್ಯನವರು ಮರಳಿ ಮನೆಗೆ ಬಂದ ನಂತರ ತೋಟಕ್ಕೆ ಹೋದಾಗ ಮರಗಳನ್ನು ಕಳವು ಮಾಡಿರುವುದು ತಿಳಿದು ಬಂದಿರುವುದಾಗಿ ನೀಡಿದ ದೂರಿನ ಮೇರೆಗೆ ಶನಿವಾರಸಂತೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಮಹಿಳೆ ಆತ್ಮಹತ್ಯೆ

                       ದಿನಾಂಕ 17/07/2017ರಂದು ಸೋಮವಾರಪೇಟೆ ಬಳಿಯ ಲೋಡರ್ಸ್‌ ಕಾಲೋನಿ ನಿವಾಸಿ ಪಾರ್ವತಿ ಎಂಬಾಕೆಯು ಮನೆಯಲ್ಲಿ ಯಾರೂ ಇಲ್ಲದ ವೇಳೆ ಮನೆಯ ಸೀಲಿಂಗ್ ಫ್ಯಾನಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ  ಕೈಗೊಂಡಿದ್ದಾರೆ. 

ಕೆರೆಗೆ ಬಿದ್ದು  ವ್ಯಕ್ತಿ ಸಾವು

                        ದಿನಾಂಕ 16/07/2017ರಂದು ಪೊನ್ನಂಪೇಟೆ ಬಳಿಯ ದೇವರಪುರ ನಿವಾಸಿ ಅಣ್ಣು ಎಂಬವರು ಮನೆಗೆ ನೀರು ತರುವ ಸಲುವಾಗಿ ಬಿಂದಿಗೆಯೊಂದಿಗೆ ಬಾವಿಯ ಕಡೆ ಹೋಗಿದ್ದು ಸುಮಾರು ಸಮಯ ಕಳೆದರೂ ಅಣ್ಣುರವರು ಮನೆಗೆ ಹಿಂದಿರುಗದ ಕಾರಣ ಪತ್ನಿ ಜಾನಕಿಯವರು ಅಣ್ಣುರವರನ್ನು ಹುಡುಕಾಡಿದಾಗಲೂ ಪತ್ತೆಯಾಗದಿದ್ದು ದಿನಾಂಕ 17/07/2017ರಂದು ಅಣ್ಣುರವರ ಮೃತ ದೇಹವು  ಅವರು ಕೆಲಸ ಮಾಡುತ್ತಿರುವ ಕೊಟ್ಟಂಗಡ ಬೋಪಯ್ಯ ಎಂಬವರ ಕೆರೆಯಲ್ಲಿ ತೇಲುತ್ತಿದ್ದು ಅಣ್ಣುರವರು ಸ್ನಾನ ಮಾಡಲೆಂದು ಕೆರೆಗೆ ಹೋಗಿ ಕಾಲು ಜಾರಿ ಕೆರೆಗೆ ಬಿದ್ದು ಮೃತರಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ವಾಹನ ಅಪಘಾತ ವ್ಯಕ್ತಿಯ ದುರ್ಮರಣ 

                 ದಿನಾಂಕ 16-06-2017 ರಂದು ಕುಶಾಲನಗರ ಗುಮ್ಮನಕೊಲ್ಲಿಯ ನಿವಾಸಿ ಸ್ವಾಮಿ ಎಂಬುವವ ರ ಮಗ ಪವನ್ ಕುಮಾರ್ ಎಂಬುವವರು ಕುಶಾಲನಗರದಿಂದ ಮೋಟಾರು ಸೈಲಿನಲ್ಲಿ ಗುಡ್ಡೆಹೊಸೂರುವಿಗೆ ಹೋಗುತ್ತಿರುವಾಗ ಮಾದಪಟ್ನ ಎಂಬಲ್ಲಿ ಎದುರುಗಡೆಯಿಂದ ಒಂದು ಮಿನಿ ಬಸ್ ನ್ನು ಅದರ ಚಾಲಕ ಅಜಾರೂಕತೆಯಿಂದ ಚಾಲನೆ ಮಾಡಿ ಮೋಟಾರು ಸೈಕಲಿಗೆ ಡಿಕ್ಕಿ ಪಡಿಸಿದ ಪರಿಣಾಮ ಪವನ್ ಕುಮಾರ್ ಸ್ಥಳದಲ್ಲಿಯೇ ಮೃತಪಟ್ಟಿದ್ದು ಈ ಬಗ್ಗೆ ಕುಶಾಲನಗರ ಸಂಚಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಕಳವು ಪ್ರಕರಣ

                 ವಿರಾಜಪೇಟೆ ತಾಲೂಕಿನ ಗೋಣಿಕೊಪ್ಪ ನಗರದಲ್ಲಿ ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ಬೀಗ ಮುರಿದು ಮನೆಯ ಒಳ ನುಗ್ಗಿ ಕಳವು ಮಾಡಿರುವ ಘಟನೆ ವರದಿಯಾಗಿದೆ. ಗೋಣಿಕೊಪ್ಪ ನಗರದ ಮಹಾಲಕ್ಷ್ಮಿ ದೇವಸ್ಥಾನದ ಹತ್ತಿರದ ನಿವಾಸಿ ಶ್ರೀಮತಿ ಪುಷ್ಪಾವತಿ ಎಂಬುವವರು ದಿನಾಂಕ 13-07-2017 ರಂದು ತನ್ನ ಪತಿಯೊಂದಿಗೆ ಮಂಗಳೂರಿಗೆ ಮಗಳ ಮನೆಗೆ ಹೋಗಿದ್ದು ದಿನಾಂಕ 16-07-2017 ರಂದು ಪಕ್ಕದ ಮನೆಯ ರಾಧಾರವರು ಕರೆ ಮಾಡಿ ಮನೆಯ ಮುಂದಿನ ಬಾಗಿಲಿನ ಬೀಗ ಮುರಿದಿರುವುದಾಗಿ ತಿಳಿಸಿದ ಮೇರೆಗೆ ಕೂಡಲೇ ಬಂದು ಪರಿಶೀಲಿಸಲಾಗಿ ಮನೆಯ ಮುಂದಿನ ಬಾಗಿಲಿನ ಬೀಗ ಮುರಿದು ಯಾರೋ ಕಳ್ಳರು ಒಳ ನುಗ್ಗಿ 164 ಗ್ರಾಂ ತೂಕದ ಚಿನ್ನಾಭರಣ ಮತ್ತು ರೂ 15,000 ನಗದು ಹಣ ಕಳವಾಗಿರುವುದಾಗಿ ಪುಷ್ಪಾವತಿಯವರು ನೀಡಿದ ದೂರಿನ ಮೇರೆಗೆ ಗೋಣಿಕೊಪ್ಪ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಗುಂಡು ಹಾರಿಸಿ ಸೋದರನ ಹತ್ಯೆ

                          ಗುಂಡು ಹಾರಿಸಿ ಸೋದರನ ಹತ್ಯೆಗೈದ ಪ್ರಕರಣ ಸುಂಟಿಕೊಪ್ಪ ಬಳಿಯ ಹರದೂರು ಬಳಿ ನಡೆದಿದೆ. ಹರದೂರು ನಿವಾಸಿ ಮೇದುರ ಸುರೇಶ್‌ ಎಂಬಾತನೇ ಅಣ್ಣನಿಂದ ಹತ್ಯೆಗೊಳಗಾದ ವ್ಯಕ್ತಿ.

                            ದಿನಾಂಕ 15/07/2017ರಂದು ಹರದೂರಿನಲ್ಲಿ ಮೇದುರ ಸುರೇಶ್‌ರವರ ಮನೆಗೆ ಬಂದ ಆತನ ಅಣ್ಣ ಮೇದುರ ಕಾವೇರಪ್ಪ ಎಂಬಾತ ಆಸ್ತಿ ವಿಚಾರಕ್ಕೆ ಸಂಬಂಧಿಸಿದ ಕಾಗದಪತ್ರಕ್ಕೆ ಸಹಿ ಹಾಕುವಂತೆ ತಾಯಿಯನ್ನು ಒತ್ತಾಯಿಸಿದ್ದು ಆಗ ಅಲ್ಲಿಗೆ ಬಂದ ಸುರೇಶ್‌ರವರು ಕಾಗದ ಪತ್ರಕ್ಕೆ ಏಕಾ ಏಕಿ ಸಹಿ ಹಾಕದೆ ನಾಲ್ಕು ಜನರ ಸಮ್ಮುಖದಲ್ಲಿ ಸಹಿ ಹಾಕುವಂತೆ ತಾಯಿಗೆ ಹೇಳಿದ್ದರೆನ್ನಲಾಗಿದೆ. ನಂತರ ಸುರೇಶ್‌ರವರು ಗದ್ದೆಯ ಕಡೆಗೆ ಹೋಗಿದ್ದು ಆ ಸಂದರ್ಭದಲ್ಲಿ ಅಣ್ಣ ಕಾವೇರಪ್ಪ ಕೋವಿಯೊಂದನ್ನು ಆತನ ಕಾರಿಗೆ ಹಾಕಿಕೊಂಡು  ಸುರೇಶನನ್ನು ಹಿಂಬಾಲಿಸಿದ್ದು ಸುರೇಶನ ಪತ್ನಿ ಶಾರದಾರವರು ಕೂಡಲೇ ಅವರಿಬ್ಬರನ್ನು ಹಿಂಬಾಲಿಸಿ ಹೋಗುವಷ್ಟರಲ್ಲಿ ಕಾವೇರಪ್ಪನವರು ಸುರೇಶ್‌ರವರಿಗೆ ಹಿಂಭಾಗದಿಂದ ಗುಂಡು ಹಾರಿಸಿದ್ದು ಸುರೇಶ್‌ರವರು ರಕ್ತದ ಮಡುವಿನಲ್ಲಿ ಬಿದ್ದುದನ್ನು ಕಂಡು ಶಾರದಾರವರು ಕಿರುಚಿಕೊಂಡಾಗ ಕಾವೇರಪ್ಪನವರು ಶಾರದಾರನ್ನು ಸಹ ಕೊಲ್ಲುವುದಾಗಿ ಬೆದರಿಕೆ ಹಾಕಿ ಕಾರಿನಲ್ಲಿ ಹೊರಟು ಹೋದರೆನ್ನಲಾಗಿದೆ. ಕೂಡಲೇ ಶಾರದಾರವರು ನೆರೆಯ ಹೊನ್ನಪ್ಪ ಮತ್ತು ಪುಟ್ಟಣ್ಣ ಎಂಬವರ ಸಹಾಯದಿಂದ ಗಾಯಾಳು ಸುರೇಶ್‌ರವರನ್ನು ಚಿಕಿತ್ಸೆಗಾಗಿ ಮಡಿಕೇರಿಯ ಜಿಲ್ಲಾ ಆಸ್ಪತ್ರೆಗೆ ಸಾಗಿಸಿದಾಗ ಅಲ್ಲಿ ವೈದ್ಯರು ಸುರೇಶ್‌ರವರು ಮೃತಪಟ್ಟಿರುವುದಾಗಿ ದೃಢೀಕರಿಸಿರುವುದಾಗಿ ಶಾರದಾರವರು ನೀಡಿದ ದೂರಿನ ಮೇರೆಗೆ ಸುಂಟಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಬೈಕ್‌ ಅವಘಢ

                         ದಿನಾಂಕ 14/07/2017ರಂದು ಕುಶಾಲನಗರ ಬಳಿಯ ಕೂಡಿಗೆ ನಿವಾಸಿ ಕಿರಣ್ ಎಂಬವರು ಅವರ ಕೆಎ-13-ಜೆ-4192ರ ಬೈಕಿನಲ್ಲಿ ಕೂಡು ಮಂಗಳೂರು ಬಳಿ ಹೋಗುತ್ತಿರುವಾಗ ಬೈಕನ್ನು ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿ ರಸ್ತೆಯಲ್ಲಿ ಹೋಗುತ್ತಿದ್ದ ಒಂದು ಬಿಳಿ ಬಣ್ಣದ ಹಸುವಿಗೆ ಡಿಕ್ಕಿಪಡಿಸಿದ ಪರಿಣಾಮ ಹಸು ಸಾವಿಗೀಡಾಗಿದ್ದು ಕಿರಣ್‌ರವರಿಗೂ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ ಸಂಚಾರಿ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಪರಸ್ಪರ ಕಾರು ಡಿಕ್ಕಿ

                     ದಿನಾಂಕ 15/07/2017ರಂದು ತುಮಕೂರಿನ ನಿವಾಸಿ ನವೀನ್‌ ಕುಮಾರ್ ಎಂಬವರು ಅವರ ಕೆಎ-06-ಡಿ-9794ರ ಕಾರಿನಲ್ಲಿ ತುಮಕೂರಿನ ನಿವಾಸಿಗಳಾದ ಗಂಗಾಧರ, ಕಿಶೋರ್‌ ಮತ್ತು ಇತರರನ್ನು ಪ್ರವಾಸಕ್ಕೆಂದು ಮಡಿಕೇರಿಗೆ ಕರೆದುಕೊಂಡು ಬಂದು ಮಡಿಕೇರಿಯ ಬಳಿ ಅಬ್ಬಫಾಲ್ಸ್  ಜಲಪಾತವನ್ನು ವೀಕ್ಷಿಸಿ ಮಡಿಕೇರಿ ಕಡೆಗೆ ಮರಳಿ ಬರುತ್ತಿರುವಾಗ ಕೆ.ನಿಡುಗಣೆ ಗ್ರಾಮದ ಬಳಿ ಕೆಎ-03-ಡಿ-7089ರ ಇನ್ನೋವಾ ಕಾರನ್ನು ಅದರ ಚಾಲಕ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ನವೀನ್‌ರವರು ಚಾಲಿಸುತ್ತಿದ್ದ ಕಾರಿಗೆ  ಡಿಕ್ಕಿಪಡಿಸಿದ ಪರಿಣಾಮ ಎರಡೂ ಕಾರುಗಳಿಗೆ ಹಾನಿಯುಂಟಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

 ಕ್ಷುಲಕ ಕಾರಣಕ್ಕೆ ವ್ಯಕ್ತಿ ಮೇಲೆ ಹಲ್ಲೆ:

     ವ್ಯಕ್ತಿಯೋರ್ವರು ನೀರಿನ ಕಣಿವೆಯಲ್ಲಿ ಕೆಲಸ ಮಾಡುತ್ತಿದ್ದಾಗ ಅವರ ಮೇಲೆ ಮೂವರು ಸೇರಿ ಹಲ್ಲೆನಡೆಸಿದ ಬಗ್ಗೆ ವರದಿಯಾಗಿದೆ. ಭಾಗಮಂಡಲ ಪೊಲೀಸ್ ಠಾಣಾ ವ್ಯಾಪ್ತಿಯ ತಣ್ಣಿಮಾನಿ ಗ್ರಾಮದ ನಿವಾಸಿ ಡಿ.ಎಸ್. ವೇಗೇಂದ್ರ ಎಂಬವರು ದಿನಾಂಕ 13-7-2017 ರಂದು ನೀರಿನ ಕಣಿವಯಲ್ಲಿ ಕೆಲಸ ಮಾಡುತ್ತಿದ್ದಾಗ ಅದೇ ಗ್ರಾಮದ ನಿವಾಸಿಗಳಾದ ಪೂಣಚ್ಚ, ರಮೇಶ ಮತ್ತು ತುಳಸಿ ಎಂಬವರುಗಳು ಅಲ್ಲಿಗೆ ಬಂದು ‘ಏಕೆ ಕಲ್ಲನ್ನು ಒಡಿಯುತ್ತೀಯಾ ಎಂದು ಜಗಳ ಮಾಡಿ ಕತ್ತಿಯಿಂದ ಕಡಿದು ಗಾಯಪಡಿಸಿದ್ದಲ್ಲದೆ ಗುದ್ದಲಿಯಿಂದ ಹಲ್ಲೆ ನಡೆಸಿರುತ್ತಾರೆಂದು ಜಿಲ್ಲಾಸ್ಪತ್ರೆ, ಮಡಿಕೇರಿಯಲ್ಲಿ ಚಿಕಿತ್ಸೆಗೆ ದಾಖಲಾಗಿ ನೀಡಿದ ದೂರಿನ ಮೇರೆಗೆ ಭಾಗಮಂಡಲ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. 

ಅಕ್ರಮ ಮರಳು ಸಾಗಾಟ, ಪ್ರಕರಣ ದಾಖಲು:

     ಸಿದ್ದಾಪುರ ಠಾಣಾ ಸರಹದ್ದಿನ ಗುಹ್ಯ ಗ್ರಾಮದ ಕಕ್ಕಟಕಾಡು ಎಂಬಲ್ಲಿ ದಿನಾಂಕ 14-7-2017 ರಂದು ಯಾರೋ ಅಪರಿಚಿತ ವ್ಯಕ್ತಿಗಳು ಲಾರಿಯಲ್ಲಿ ಅಕ್ರಮವಾಗಿ ಮರಳನ್ನು ತುಂಬಿಸಿ ಸಾಗಾಟಮಾಡುತ್ತಿದ್ದಾರೆಂಬ ಮಾಹಿತಿ   ಸಿದ್ದಾಪುರ ಪೊಲೀಸ್ ಠಾಣಾಧಿಕಾರಿ ಶ್ರೀ ಜಿ.ಕೆ. ಸುಬ್ರಮಣ್ಯರವರಿಗೆ ಬಂದ ಹಿನ್ನೆಲೆಯಲ್ಲಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ಮುಂದಿನ ಕ್ರಮ ಕೈಗೊಂಡಿರುತ್ತಾರೆ.

 ಗೋದಾಮಿನಿಂದ ಕಾಫಿ ಕಳವು:

      ಕಾಫಿ ಗೋದಾಮಿನ ಬೀಗವನ್ನು ಮುರಿದು ಕಾಫಿ ಕಳ್ಳತನ ಮಾಡಿದ ಘಟನೆ ವಿರಾಜಪೇಟೆ ಸಮೀಪದ ಬೇಟೋಳಿ ಗ್ರಾಮದಲ್ಲಿ ನಡೆದಿದೆ. ವಿರಾಜಪೇಟೆ ನಗರ ಠಾಣಾ ವ್ಯಾಪ್ತಿಯ ಬೇಟೋಳಿ ಗ್ರಾಮದ ನಿವಾಸಿ ಬಿ.ಎಸ್. ಆನಂದರಾವ್ ಎಂಬವರು ಅದೇ ಗ್ರಾಮದ ತಿಮ್ಮಯ್ಯ ಎಂಬವರಿಗೆ ಸೇರಿದ ಕಟ್ಟಡದಲ್ಲಿ ಆರ್ಜಿ ಕಾಫಿ ಕ್ಯೂರಿಂಗ್ ವರ್ಕ್ಸ್ ಎಂಬ ಕಾಫಿ ಸಂಸ್ಕರಣಾ ಕೇಂದ್ರವನ್ನು ನಡೆಸುತ್ತಿದ್ದು ಸದರಿ ಕೇಂದ್ರದ ಶೆಟ್ಟರ್ಸ್ ಗೆ ಹಾಕಿದ ಬೀಗವನ್ನು ದಿನಾಂಕ 12-7-2017 ರಂದು ರಾತ್ರಿ ಯಾರೋ ಕಳ್ಳರು ಒಡೆದು  ಸಂಸ್ಕರಣಾ ಕೇಂದ್ರದಲ್ಲಿ ಶೇಖರಿಸಿಟ್ಟಿದ್ದ 520 ಕಾಫಿ ಚೀಲಗಳ ಪೈಕಿ 3 ಕಾಫಿ ತುಂಬಿದ ಚೀಲಗಳನ್ನು ಕಳವು ಮಾಡಿಕೊಂಡು ಹೋಗಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಮನೆಗೆ ನುಗ್ಗಿ ಚಿನ್ನಾಭರಣ, ನಗದು ಕಳವು:

    ಕುಶಾಲನಗರ ಗ್ರಾಮಾಂತರ ಠಾಣಾ ವ್ಯಾಪ್ತಿಯ ಕೂಡುಗಂಗಳೂರು ಗ್ರಾಮದ ನಿವಾಸಿ ಶ್ರೀಮತಿ ರೇಣುಕಾ ಬಸವರಾಜ ಶೆಟ್ಟಿ ಎಂಬವರು ದಿನಾಂಕ 13.07.2017 ರಂದು ಬೆಳಿಗ್ಗೆ ಸಮಯ ಸುಮಾರು 10.30 ಗಂಟೆಗೆ ತಮ್ಮ ಮನೆಗೆ ಡೋರ್ ಲಾಕ್ ಮಾಡಿಕೊಂಡು ಧರ್ಮಸ್ಥಳ ಸಂಘದ ಹಣವನ್ನು ಕಟ್ಟುವಂತೆ ಸದಸ್ಯ್ರರಿಗೆ ತಿಳಿಸುವ ಸಲುವಾಗಿ ಮದಲಾಪುರ ಗ್ರಾಮಕ್ಕೆ ಹೋಗಿ ವಾಪಾಸ್ಸು ಸಮಯ ಸುಮಾರು 13.00 ಗಂಟೆಗೆ ಮನೆಗೆ ಬಂದಾಗ ಯಾರೋ ಕಳ್ಳರು ಮನೆಯ ಮುಂಭಾಗದ ಬಾಗಿಲನ್ನು ಮೀಟಿ ಮುರಿದು ಒಳನುಗ್ಗಿ ಮಲಗುವ ಕೋಣೆಯಲ್ಲಿದ್ದ ಗಾಡ್ರೇಜ್ ಮತ್ತು ವಾಲ್ ರೋಬ್ ಗಳ ಬಾಗಿಲನ್ನು ತೆಗೆದು ಅದರಲ್ಲಿದ್ದ ಅಂದಾಜು ರೂ. 2,50,000/- ಬೆಲೆಯ ಚಿನ್ನಾಭರಣ, ರೂ.20,000/- ಬೆಲೆಬಾಳುವ ಬೆಳ್ಳಿಯ ವಸ್ತುಗಳು ಹಾಗೂ ನಗದು ಹಣ ರೂ.70,000/- ಸೇರಿ ಒಟ್ಟು ರೂ.3,40,000/- ಮೌಲ್ಯದ ಚಿನ್ನ, ಬೆಳ್ಳಿ ಹಾಗೂ ನಗದನ್ನು ಕಳ್ಳತನ ಮಾಡಿಕೊಂಡು ಹೋಗಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ಕುಶಾಲನಗರ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಬಾಡಿಗೆ ಹಣ ನೀಡದ ವಂಚನೆ:

      ಕುಶಾಲನಗರದ ತ್ಯಾಗರಾಜ ರಸ್ತೆಯಲ್ಲಿರುವ ಕಾಶಿಪತಿ ಎಂಬವರು ವಾಸವಾಗಿದ್ದು ಅವರಿಗೆ ಸೇರಿದ ಮನೆಯನ್ನು ಲಕ್ಷ್ಮಣ್ ಎಂಬವರಿಗೆ ಬಾಡಿಗೆಗೆ ನೀಡಿದ್ದು, ಸದರಿಯವರು ಕುಶಾಲನಗರ ಸರಕಾರಿ ಆಸ್ಪತ್ರೆಯ ಶವಾಗಾರದ ಕಾಮಗಾರಿ ಕೆಲಸವನ್ನು ನಿರ್ವಹಿಸುತ್ತಿದ್ದು, ದಿನಾಂಕ 20-4-2014 ರಿಂದ ಸದರಿ ಮನೆಯಲ್ಲಿ ವಾಸವಾಗಿದ್ದುಕೊಂಡು ಬಾಡಿಗೆ ಹಣವನ್ನು ಸರಿಯಾಗಿ ನೀಡದೆ ಸುಮಾರು 82,000 ರೂ. ಬಾಡಿಗೆ ಹಣವನ್ನು ನೀಡದೆ ವಂಚಿಸಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ಕುಶಾಲನಗರ ಪಟ್ಟಣ ಪೊಲೀಸರು ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದು, ತನಿಖೆ ಕೈಗೊಂಡಿದ್ದಾರೆ.


ಕತ್ತಿಯಿಂದ ಕಡಿದು ವ್ಯಕ್ತಿ ಕೊಲೆಗೆ ಯತ್ನ:

      ಮಡಿಕೇರಿ ತಾಲೋಕು ತಣ್ಣಿಮಾನಿ ಗ್ರಾಮದ ನಿವಾಸಿ ಡಿ.ಎಸ್. ಪೂಣಚ್ಚ ಎಂಬವರು ದಿನಾಂಕ 13-7-2017 ರಂದು ತಮ್ಮ ಗದ್ದೆಯಲ್ಲಿ ಕೆಲಸ ಮಾಡಿಕೊಂಡಿರುವಾಗ ಅದೇ ಗ್ರಾಮದ ವಾಸಿ ವೇಗೇಂದ್ರ ಎಂಬವರು ಅಲ್ಲಿಗೆ ಬಂದು ಏಕೆ ನಮ್ಮ ಜಾಗಕ್ಕೆ ಬಂದೆ ಎಂದು ಹೇಳಿ ಕೊಲೆ ಮಾಡುವ ಉದ್ದೇಶದಿಂದ ಕತ್ತಿಯಿಂದ ಡಿ.ಎಸ್. ಪೂಣಚ್ಚನವರ ಕುತ್ತಿಗೆ ಭಾಗಕ್ಕೆ ಹಲ್ಲೆ ನಡೆಸಿ ಗಾಯಪಡಿಸಿದ್ದು ಕೊಲೆಗೆ ಯತ್ನಿಸಿದ್ದಾರೆಂದು ನೀಡಿದ ದೂರಿನ ಮೇರೆಗೆ ಭಾಗಮಂಡಲ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.







ವ್ಯಕ್ತಿಯ ಮೇಲೆ ಹಲ್ಲೆ:







ಕುಟ್ಟ ಠಾಣಾ ವ್ಯಾಪ್ತಿಯ ನಾಥಂಗಾಲ ಗ್ರಾಮದ ನಿವಾಸಿ ಶ್ರೀಮತಿ ಸುಶೀಲ ಎಂಬವರ ಮಗನಾದ ಪ್ರಜೀಸ್ ಎಂಬವ ಮೇಲೆ ಅದೇ ಗ್ರಾಮದ ನಿವಾಸಿ ದಾಸ ಎಂಬವರು ಕೈಗಳನ್ನು ಬೆನ್ನಿನ ಹಿಂದಕ್ಕೆ ಕಟ್ಟಿ ಹಲ್ಲೆ ನಡೆಸಿದ್ದು ಸದರಿಯವರು ಕುಟ್ಟ ನಗರದ ವಿವೇಕ್ ರಾವ್ ರವರ ಕ್ಲೀನಿಕ್ ನಲ್ಲಿ ಚಿಕಿತ್ಸೆ ಪಡೆದುಕೊಂಡು ಹೆಚ್ಚುಬ ಚಿಕಿತ್ಸೆಗಾಗಿ ದಿನಾಂಕ 13-07-2017 ರಂದು ಕುಟ್ಟ ಸರ್ಕಾರಿ ಆಸ್ಪತ್ರಗೆ ದಾಖಲು ಮಾಡಿದ್ದು, ಈ ಸಂಬಂಧ ಕುಟ್ಟ ಠಾಣೆಯಲ್ಲಿ ಶ್ರೀಮತಿ ಸುಶೀಲ ರವರ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಬಾರ್‌ ದಾಂಧಲೆ, ಆರೋಪಿಗಳ ಬಂಧನ
                       ದಿನಾಂಕ 10-07-2017ರಂದು ಸಂಜೆ ಮಡಿಕೇರಿ ನಗರದ ಕೆಎಸ್ಆರ್‌ಟಿಸಿ ಬಸ್ ನಿಲ್ದಾಣದ ಸಮೀಪದ ಮಾರುತಿ ಬಾರ್‌ಗೆ ಹೆಲ್ಮೆಟ್ ಧರಿಸಿಕೊಂಡು ಕಲ್ಲು ತೂರಿ ದಾಂದಲೆ ನಡೆಸಿರುವ ಘಟನೆಗೆ ಸಂಬಂಧಿಸಿದಂತೆ ಆರೋಪಿಗಳನ್ನು ಜಿಲ್ಲಾ ಪೊಲೀಸರು ಬಂಧಿಸಿದ್ದಾರೆ.

                           ದಿನಾಂಕ 10-7-2017ರಂದು ಸಂಜೆ ಮಾರುತಿ ಬಾರಿನಲ್ಲಿ ಮದ್ಯಪಾನ ಮಾಡಲು ಬಂದಿದ್ದ ಗಾಳಿಬೀಡು ಗ್ರಾಮದ ಮೊಣ್ಣಪ್ಪ ಯಾನೆ ಸರಾ ಎಂಬವರು ಮನೆಯಲ್ಲಿ ಇಟ್ಟಿದ್ದ ಕೋವಿ ಕಾಣೆಯಾಗಿರುವ ಬಗ್ಗೆ ಅದೇ ಗ್ರಾಮದ ಕುಡಿಯರ ಲವ ಮತ್ತು ಕೀರ್ತನ್ ಇವರ ಜೊತೆಯಲ್ಲಿ ವಾಗ್ವಾದ ಮಾಡುತ್ತಿರುವಾಗ ಅಲ್ಲಿಗೆ ಮದ್ಯಪಾನ ಮಾಡಲು ಬಂದ ದೇಶಿಕ್ ಮತ್ತು ಮನೋಜ್ ಎಂಬವರುಗಳು ಅವರಿಗೆ ಸಂಬಂಧ ಇಲ್ಲದ ವಿಷಯಕ್ಕೆ ಜಗಳ ಮಾಡಿದ್ದು ಬಾರಿನಲ್ಲಿದ್ದವರು ಇವರ ಜಗಳ ಬಿಡಿಸಿ ಕಳುಹಿಸಿರುತ್ತಾರೆ. ಮದ್ಯಪಾನ ಮಾಡಿದ್ದ ದೇಶಿಕನು ಬಾರಿನಲ್ಲಿದ್ದವರು ತಮ್ಮ ಮೇಲೆ ಹಲ್ಲೆ ಮಾಡಿದ್ದಾರೆಂದು ಸಿಟ್ಟಿಗೆದ್ದು ಮೊಬೈಲ್ ಕರೆ ಮಾಡಿ ತಮ್ಮ ಗೆಳೆಯರನ್ನು ಮಡಿಕೇರಿಗೆ ಕರೆಸುತ್ತಾನೆ.

                         ಸ್ನೇಹಿತನ ಮೇಲೆ ಹಲ್ಲೆಗೆ ಕಾರಣವಾದ ಮಾರುತಿ ಬಾರಿನ ಮೇಲೆ ಪ್ರತಿಕಾರ ತೀರಿಸಲು ಆತನ ಸ್ನೇಹಿತರ ತಂಡವೊಂದು ರಾತ್ರಿ ವೇಳೆ ಮಡಿಕೇರಿಗೆ ಬಂದು ಒಟ್ಟು ಸೇರಿ ಕಲ್ಲು ಮತ್ತು ಸೋಡಾ ಬಾಟಲಿಗಳನ್ನು ಸಂಗ್ರಹಿಸಿ ಸಿನಿಮೀಯ ಮಾದರಿಯಲ್ಲಿ ಹಠಾತ್ತಾಗಿ ಬಾರಿನ ಮೇಲೆ ಕಲ್ಲು ಹಾಗೂ ಬಾಟಲಿಗಳನ್ನು ತೂರಿ ಧಾಳಿ ಮಾಡಿ ಬಾರಿನಲ್ಲಿದ್ದ ಕೆಲಸಗಾರರ ಮೇಲೆ ಹಲ್ಲೆ ಮಾಡಿ ಮದ್ಯದ ಬಾಟಲುಗಳನ್ನು ನಾಶಪಡಿಸುತ್ತಾರೆ. ಘಟನೆಯ ಸಿಸಿಟಿವಿ ದೃಷ್ಯಾವಳಿಗಳು ನಗರದ ಸಾರ್ವಜನಿಕರಲ್ಲಿ ಆತಂಕವನ್ನು ಸೃಷ್ಟಿಸಿತ್ತು.

                      ಈ ಬಗ್ಗೆ ಮಡಿಕೇರಿ ನಗರ ಠಾಣೆಯಲ್ಲಿ ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿತ್ತು. ಪ್ರಕರಣದ ಆರೋಪಿಗಳನ್ನು ಪತ್ತೆ ಮಾಡಲು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪಿ. ರಾಜೇಂದ್ರ ಪ್ರಸಾದ್, ಐಪಿಎಸ್‌ರವರು ಪ್ರಕರಣವನ್ನು ಡಿಸಿಐಬಿ ವಿಭಾಗಕ್ಕೆ ವಹಿಸಿದ್ದು, ತನಿಖೆ ನಡೆಸಿದ ಡಿಸಿಐಬಿ ವಿಭಾಗದ ಪೊಲೀಸ್ ನಿರೀಕ್ಷಕರಾದ ಕರೀಂ ರಾವ್‌ತರ್ ಹಾಗೂ ತಂಡ ದಿನಾಂಕ 13-7-2017ರಂದು ಘಟನೆಯ ಆರೋಪಿಗಳಾದ ಮಡಿಕೇರಿ ಬಳಿಯ ಅರುತೊಕ್ಲು ಗ್ರಾಮದ ನಿವಾಸಿ ಪ್ರಸ್ತುತ ನಗರದ ಮೆಡಿಕಲ್‌ ಕಾಲೇಜಿನಲ್ಲಿ ಸ್ಟೋರ್‌ ಕೀಪರ್‌ ಆಗಿರುವ ಟಿ.ಜಿ.ದೇಶಿಕ್, ಕಾರುಗುಂದ ಗ್ರಾಮದ ನಿವಾಸಿ ಮನೋಜ್‌ ಕೆ.ಎಸ್., ಫ್ಯಾಶನ್ ಡಿಸೈನಿಂಗ್‌ ವಿದ್ಯಾರ್ಥಿಯಾಗಿರುವ ಅರುವತೊಕ್ಲು ಗ್ರಾಮದ ಪಿ.ಡಿ.ಕುಶ, ಚೆಟ್ಟಳ್ಳಿ ಬಳಿಯ ಕಂಡಕೆರೆ ನಿವಾಸಿಗಳಾದ ಶ್ರವಣ್, ಫಯಾಜ್, ಮತ್ತು ಮಂಗಳಾದೇವಿ ನಗರದ ಕಿರಣ್‌ ಎಂಬ ಆರು ಜನರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

                    ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಪಿ.ರಾಜೇಂದ್ರ ಪ್ರಸಾದ್‌ರವರ ಮಾರ್ಗದರ್ಶನದಲ್ಲಿ ನಡೆದ ಪತ್ತೆ ಕಾರ್ಯಾಚರಣೆಯಲ್ಲಿ ಡಿಸಿಐಬಿ ಪೊಲೀಸ್ ನಿರೀಕ್ಷಕರಾದ ಕರೀಂ ರಾವ್‌ತರ್ ಎಎಸ್ ಐಗಳಾದ ಕೆ.ವೈ.ಹಮೀದ್ ,ಎನ್.ಟಿ. ತಮ್ಮಯ್ಯ, ಸಿಬ್ಬಂದಿಗಳಾದ ವಿ.ಜಿ.ವೆಂಕಟೇಶ್, ಕೆ.ಎಸ್.ಅನಿಲ್‌ಕುಮಾರ್, ಎಂ.ಎನ್.ನಿರಂಜನ್, ಬಿ.ಎಲ್. ಯೊಗೇಶ್ ಕುಮಾರ್, ಕೆ.ಆರ್.ವಸಂತ, ಕೆ.ಎಸ್.ಶಶಿಕುಮಾರ್ ಮತ್ತು ಯು.ಎ.ಮಹೇಶ್ ರವರು ಪಾಲ್ಗೊಂಡಿದ್ದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗಳು ತಂಡದ ಕಾರ್ಯವನ್ನು ಶ್ಲಾಘಿಸಿದ್ದಾರೆ.


ಬಾಲಕ ಕಾಣೆ

                        ದಿನಾಂಕ 11/07/2017ರಂದು ಮಡಿಕೇರಿ ನಗರದ ಬಾಲಕರ ಬಾಲ ಮಂದಿರದಲ್ಲಿರುವ ಸುಪ್ರೀತ್ ಎಂಬ ಬಾಲಕನು ಎಂದಿನಂತೆ ತಾನು ವ್ಯಾಸಂಗ ಮಾಡುತ್ತಿರುವ ಮಡಿಕೇರಿ ನಗರದ ಪದವಿ ಪೂರ್ವ ಕಾಲೇಜಿನ ಪ್ರೌಢಶಾಲೆಗೆ ಹೋಗಿದ್ದು ಶಾಲೆಯಿಂದ ಮರಳಿ ಬಾಲಮಂದಿರಕ್ಕೆ ಬಂದಿರುವುದಿಲ್ಲವೆಂದು ಬಾಲ ಮಂದಿರದ ಅಧೀಕ್ಷಕರಾದ ಚರಣ್ ಎಂಬವರು ನೀಡಿದ ದೂರಿನ ಮೇರೆಗೆ ಮಡಿಕೇರಿಯ ಮಹಿಳಾ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿದೆ. 

ವ್ಯಕ್ತಿ ಆತ್ಮಹತ್ಯೆ

                       ದಿನಾಂಕ 12/07/2017ರಂದು ವಿರಾಜಪೇಟೆ ಬಳಿಯ ಹೆಗ್ಗಳ ಗ್ರಾಮದ ಎಡಮಕ್ಕಿ  ನಿವಾಸಿ ಅಣ್ಣಿ ಎಂಬವರು ರಾತ್ರಿ ವೇಳೆ ಮನೆಯ ಮಾಡಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು ಅತೀವ ಮದ್ಯವ್ಯಸನಿಯಾಗಿದ್ದ ಅಣ್ನಿರವರು ಯಾವುದೋ ಕಾರಣಕ್ಕೆ ಜುಗುಪ್ಸೆಗೊಂಡು ಆತ್ಮಹತ್ಯೆ ಮಾಡಿಕೊಂಡಿರಬಹುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಪತ್ರಿಕಾ ಪ್ರಕಟಣೆ
        ಸಾಮಾಜಿಕ ಜಾಲ ತಾಣಗಳಾದ (Whatsapp, Twitter, Facebook, Telegram etc.,)ವಾಟ್ಸಪ್, ಟ್ವಿಟ್ಟರ್, ಫೇಸ್ಬುಕ್, ಟೆಲಿಗ್ರಾಮ್ ಹಾಗೂ ಇನ್ನಿತರೆ ಜಾಲತಾಣಗಳಲ್ಲಿ ದೇಶದ ಸುರಕ್ಷತೆ ಹಾಗೂ ಜನರಲ್ಲಿ ಪ್ರಚೋದನೆ ಮೂಡಿಸುವಂತಹ ಮಾಹಿಗಳಿಂದ ರಾಜ್ಯಾದ್ಯಂತ ಸಮಾಜದಲ್ಲಿನ ಶಾಂತಿ ಹದಗೆಡುತ್ತಿದ್ದು, ಸಮಾಜದಲ್ಲಿನ ಶಾಂತಿ ಹಾಗೂ ಸುವ್ಯವಸ್ಥೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಯಾವುದೇ ಸಾಮಾಜಿಕ ಜಾಲ ತಾಣಗಳಲ್ಲಿ ಸುಳ್ಳು ಮಾಹಿತಿಯನ್ನು, ಕಾನೂನು ಬಾಹಿರ ಮಾಹಿತಿಯನ್ನು, ದೇಶದ ಸುರಕ್ಷತೆಗೆ ದಕ್ಕೆಯುಂಟು ಮಾಡುವ ಮಾಹಿತಿಯನ್ನು, ಕೋಮು ಪ್ರಚೋದನೆ ಉಂಟುಮಾಡುವ ಯಾವುದೇ ಜಾತಿ, ಭಾಷೆ, ಜನಾಂಗಗಳ ಬಗ್ಗೆ ವಿಷಯವನ್ನು ಅನಾವಶ್ಯಕವಾಗಿ ಚರ್ಚೆ ಹಾಗೂ ರವಾನೆ  ಮಾಡುವ ಯಾವುದೇ ವ್ಯಕ್ತಿ ಹಾಗೂ ( Whatsapp, Telegram Group Admin)ವಾಟ್ಸಪ್, ಟೆಲಿಗ್ರಾಮ್ ಗ್ರೂಪಿನ  ಅಡ್ಮಿನ್ ಹಾಗೂ ಮಾಹಿತಿ ರವಾನಿಸುವವರ ವಿರುದ್ಧ ಕೊಡಗು ಜಿಲ್ಲೆಯಲ್ಲಿ ಇನ್ನು ಮುಂದೆ  ನಿರ್ದಾಕ್ಷಣ್ಯವಾಗಿ  ಕಾನೂನು ಕ್ರಮ ಜರುಗಿಸಲಾಗುವುದು, ಈ ಬಗ್ಗೆ (Whatsapp, Twitter, Facebook, Telegram etc.,)ವಾಟ್ಸಪ್, ಟ್ವಿಟ್ಟರ್, ಫೇಸ್ಬುಕ್, ಟೆಲಿಗ್ರಾಮ್ ಇನ್ನಿತರೆ ಜಾಲತಾಣಗಳ ಮೇಲೆ ಹದ್ದಿನ ಕಣ್ಣು ಇರಿಸಲು ಕೊಡಗು ಜಿಲ್ಲಾ ಪೊಲೀಸ್ ಕಛೇರಿಯಲ್ಲಿ  ಸೋಷಿಯಲ್ ಮೀಡಿಯಾ ಮಾನಿಟರಿಂಗ್ ಸೆಲ್ (Social Media Monitoring Cell) ನ್ನು ಪ್ರಾರಂಭಿಸಲಾಗುವುದು.

       ಕೊಡಗು ಜಿಲ್ಲೆಯಲ್ಲಿ ಕೆಲವು ಕಿಡಿಗೇಡಿಗಳು ಕಾನೂನು ಬಾಹಿರ ಚಟುವಟಿಕೆಗಳಲ್ಲಿ ತೊಡಗಿಕೊಂಡು ಶಾಂತಿ ಕದಡಲು ಪ್ರಯತ್ನಿಸುತ್ತಿರುವುದರ ಬಗ್ಗೆ ಮಾಹಿತಿ ಇದ್ದು, ಅಂತಹವರ ವಿರುದ್ಧವೂ ಕಠಿಣ ಕ್ರಮ ಕೈಗೊಳ್ಳಲಾಗುವುದು. ಸಾರ್ವಜನಿಕರು ಇಂತಹ ವ್ಯಕ್ತಿಗಳ ಬಗ್ಗೆ ಮಾಹಿತಿ ನೀಡಿ ಪೊಲೀಸ್ ಇಲಾಖೆಯೊಂದಿಗೆ ಸಹಕರಿಸುವುದು, ಮಾಹಿತಿದಾರರ ಹೆಸರನ್ನು ಗೌಪ್ಯವಾಗಿ ಡಲಾಗುವುದು. ಈಗಾಗಲೇ ಪೊಲೀಸ್ ಇಲಾಖೆಯವತಿಯಿಂದ ಜಿಲ್ಲೆಯ ಎಲ್ಲಾ ಶಾಲಾ ಕಾಲೇಜುಗಳಲ್ಲಿ ಸಲಹಾ ಪೆಟ್ಟಿಗೆಯನ್ನು ಇರಿಸಲಾಗಿದ್ದು, ಇದರ ಸದುಪಯೋಗ ಪಡೆದುಕೊಂಡು ವಿಧ್ಯಾರ್ಥಿಗಳು ಕಾನೂನು ಬಾಹಿರ ಚಟುವಟಿಕೆಗಳಲ್ಲಿ ತೊಡಗಿರುವವರ ಬಗ್ಗೆ ಮಾಹಿತಿ ನೀಡುವಂತೆ  ಕೊಡಗು ಜಿಲ್ಲಾ ಪೊಲೀಸ್ ಅಧೀಕ್ಷಕರು ತಿಳಿಸಿರುತ್ತಾರೆ.

 ಸಾರ್ವಜನಿಕ ಮಾಹಿತಿ ಅಧಿಕಾರಿ
 ಕೊಡಗು ಜಿಲ್ಲೆ.
 
ಬಾಲಕರು ಕಾಣೆ

                    ದಿನಾಂಕ 09/07/2017ರಂದು ಸುಂಟಿಕೊಪ್ಪ ಬಳಿಯ ಪಂಪ್ ಹೌಸ್ ರಸ್ತೆ ನಿವಾಸಿ ಪಳನಿ ಸ್ವಾಮಿ ಎಂಬವರ ಮಕ್ಕಳಾದ ಬಾಲರಾಜು ಮತ್ತು ಸಂಜಯ ಎಂಬ ಬಾಲಕರು ಮನೆಯಿಂದ ಆಟವಾಡಲೆಂದು ಹೊರಗಡೆ ಹೋದವರು ಮರಳಿ ಬಾರದೆ ಕಾಣೆಯಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಸುಂಟಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಸ್ಕೂಟರಿಗೆ ಕಾರು ಡಿಕ್ಕಿ

                    ದಿನಾಂಕ 11/07/2017ರಂದು ಕುಶಾಲನಗರದ ಬೈಚನಹಳ್ಳಿಯ ಬಳಿಯ ಸೈದು  ಎಂಬವರ ಮಗಳು ಅಫ್ರಿದಾ ಎಂಬಾಕೆಯು ಒಂದು ಹೊಸ ಸ್ಕೂಟರಿನಲ್ಲಿ ಪಂಪ್‌ ಹೌಸ್‌ ರಸ್ತೆಯ ಕಡೆಯಿಂದ ಚಾಲನೆ ಮಾಡಿಕೊಂಡು ಬರುತ್ತಿರುವಾಗ ಕುಶಾಲನಗರ ಪಟ್ಟಣದ ಕಡೆಯಿಂದ ಕೆಎ-50-ಎನ್‌-7990ರ ಚಾಲಕನು ಕಾರನ್ನು ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಅಫ್ರಿದಾರವರು ಚಾಲಿಸುತ್ತಿದ್ದ ಸ್ಕೂಟರಿಗೆ ಡಿಕ್ಕಿಪಡಿಸಿದ  ಪರಿಣಾಮ ಅಫ್ರಿದಾರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ ಸಂಚಾರಿ ಪೊಲೀಸರು ಪ್ರಕರಣ ದಾಖಿಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಮರದಿಂದ ಬಿದ್ದು ವ್ಯಕ್ತಿಯ ಸಾವು

ದಿನಾಂಕ 06/07/2017ರಂದು ವಿರಾಜಪೇಟೆ ಬಳಿಯ ತೋರ ಗ್ರಾಮದ ನಿವಾಸಿ ಹರೀಶ್ ಎಂಬವರು ಅರುಣ ಎಂಬವರ ಕಾಫಿ ತೋಟದಲ್ಲಿ ಕಪಾತು ಕೆಲಸ ಮಾಡುತ್ತಿರುವಾಗ ಆಕಸ್ಮಿಕವಾಗಿ ಮರದಿಂದ ಬಿದ್ದು ಗಾಯಗೊಂಡಿದ್ದು ಚಿಕಿತ್ಸೆಗಾಗಿ ಮಂಗಳೂರಿನ ಕೆ.ಎಸ್‌.ಹೆಗ್ಡೆ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿತ್ತು. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಕಾರಿಯಾಗದೆ ಹರೀಶ್‌ರವರು ದಿನಾಂಕ 11/07/2017ರಂದು ಮೃತರಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಬೈಕಿಗೆ ಜೀಪು ಡಿಕ್ಕಿ

ದಿನಾಂಕ 11/07/2017ರಂದು ಸಿದ್ದಾಪುರ ಬಳಿಯ ಅಭ್ಯತ್‌ಮಂಗಲ ನಿವಾಸಿ ಅಭಿಲಾಷ್ ಎಂಬವರು ಕೆಎ-12-ಆರ್-0941ರ ಬೈಕಿನಲ್ಲಿ ಹೋಗುತ್ತಿರುವಾಗ ನೆಲ್ಲಿಹುದಿಕೇರಿಯ ಬಳಿ ಮುಂದುಗಡೆ ಕೆಎ-12-ಬಿ-1937ರ ಟಾಟಾ  ಜಿಪ್ ವಾಹನವನ್ನು ಅದರ ಚಾಲಕ ಯಾವುದೇ ಸೂಚನೆ ನೀಡದೆ ಏಕಾ ಏಕಿ ರಸ್ತೆಗೆ ತಿರುಗಿಸಿದ ಪರಿಣಾಮ ಅಭಿಲಾಶ್‌ರವರು ಬೈಕನ್ನು ಕೂಡಲೇ ಬ್ರೇಕ್‌ ಹಾಕಿ ನಿಲ್ಲಿಸದರೂ ಸಹ ಬೈಕ್ ಟಾಟಾ ಜಿಪ್‌ ವಾಹನಕ್ಕೆ ಡಿಕ್ಕಿಯಾದ ಪರಿಣಾಮ ಅಭಿಲಾಶ್‌ರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಸಿದ್ದಾಪುರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಜೀಪಿಗೆ ಕಾರು ಡಿಕ್ಕಿ

ದಿನಾಂಕ 11/07/2017ರಂದು ಮಡಿಕೇರಿಯ ಚಾಮುಂಡೇಶ್ವರಿ ನಗರ ನಿವಾಸಿ ಅಭಿಲಾಶ್‌ ಎಂಬವರು ಅಫ್ರೀದ್‌ ಎಂಬವರೊಂದಿಗೆ ಕೆಎ-12-ಎ-6048ರ ಪಿಕ್‌ಅಪ್ ಜೀಪಿನಲ್ಲಿ  ಮೂರ್ನಾಡು ಬಳಿಯ ಎಂ.ಬಾಡಗ ಗ್ರಾಮದಿಂದ ಮೂರ್ನಾಡು ಕಡೆಗೆ ಬರುತ್ತಿರುವಾಗ ಎದುರುಗಡೆಯಿಂದ ಕೆಎ-09-ಎಂ-1119ರ ಕಾರನ್ನು ಅದರ ಚಾಲಕ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಅಭಿಲಾಶ್‌ರವರ ಜೀಪಿಗೆ ಡಿಕ್ಕಿಪಡಿಸಿದ ಪರಿಣಾಮ ಅಭಿಲಾಶ್‌ರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಕ್ಷುಲ್ಲಕ ಕಾರಣ ವ್ಯಕ್ತಿಯ ಕೊಲೆಗೆ ಯತ್ನ:

     ವಿರಾಜಪೇಟೆ ತಾಲೋಕು, ಕುರ್ಚಿ ಗ್ರಾಮದ ನಿವಾಸಿ ಪಂಜರಿ ಎರವರ ಲೋಕೇಶ ಎಂಬವರು ದಿನಾಂಕ 10-7-2017 ರವರ ಕಾಳ ಎಂಬವರೊಂದಿಗೆ ಅದೇ ಗ್ರಾಮದಲ್ಲಿರುವ ಅಂಗಡಿಗೆ ಹೋಗಿದ್ದು ಸಂಜೆ 8-30 ಗಂಟೆಯ ಸಮಯದಲ್ಲಿ ಸದರಿ ಕಾಳ ರವರ ಮಗಳು ಲೋಕೇಶರವರನ್ನು ಕಂಡು ನಗುತ್ತಿದ್ದ ವಿಚಾರವಾಗಿ ಕೋಪಗೊಂಡ ಕಾಳ ಲೋಕೇಶನೊಂದಿಗೆ ಜಗಳ ಮಾಡಿ ಕೊಲೆ ಮಾಡುವುದಾಗಿ ಹೇಳಿ ಕತ್ತಿಯಿಂದ ಲೋಕೇಶನವರ ಹಣೆಗೆ ಕಡಿದು ಗಾಯಪಡಿಸಿರುತ್ತಾರೆಂದು ಲೋಕೇಶನವರು ನೀಡಿದ ದೂರಿನ ಮೇರೆಗೆ ಶ್ರೀಮಂಗಲ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ದುಷ್ಕರ್ಮಿಗಳಿಂದ ಬಾರ್ ಮೇಲೆ ದಾಳಿ, ಹಾನಿ:

     ಸುಮಾರು 10-12 ಜನರಿದ್ದ ಗುಂಪೊಂದು ತಲೆಗೆ ಹೆಲ್ಮೆಟ್ ಧರಿಸಿ ಮಡಿಕೇರಿ ನಗರದ ಬಾರ್ ವೊಂದಕ್ಕೆ ದಾಳಿ ನಡೆಸಿ ಹಾನಿಪಡಿಸಿ ಬಾರ್ ನಲ್ಲಿ ಕೆಲಸ ಮಾಡುತ್ತಿದ್ದವರಿಗೆ ಕೊಲೆ ಬೆದರಿಕೆ ಹಾಕಿದ  ಘಟನೆ ಮಡಿಕೇರಿ ನಗರದಲ್ಲಿ ನಡೆದಿದೆ. ದಿನಾಂಕ 10-7-2017 ರಂದು ರಾತ್ರಿ 8-15 ಗಂಟೆಯ ಸಮಯದಲ್ಲಿ ಅಪರಿಚಿತ 10-12 ಮಂದಿಯ ಗುಂಪೊಂದು ತಲೆಗೆ ಹೆಲ್ಮೆಟ್ ಧರಿಸಿಕೊಂಡು ಮಡಿಕೇರಿ ನಗರದಲ್ಲಿರುವ ಮಾರುತಿ ಬಾರ್ ಗೆ ನುಗ್ಗಿ ಕಲ್ಲಿನಿಂದ ಬಾರ್ ಕೌಂಟರ್ ಗೆ ಹೊಡೆದು ಮದ್ಯದ ಬಾಟಲಿಗಳನ್ನು ಮತ್ತು ಶೋಕೇಸನ್ನು ಹೊಡೆದು ಹಾನಿಪಡಿಸಿದ್ದು ಅಲ್ಲದೆ ಬಾರ್ ನಲ್ಲಿ ಕೆಲಸ ಮಾಡುತ್ತಿದ್ದ ಶಿವಮಾದುರವರ ಮೇಲೆ ಕಲ್ಲಿನಿಂದ ಹಲ್ಲೆ ನಡೆಸಿ ಗಾಯಪಡಿಸಿದ್ದು ಬಾರನಲ್ಲಿ 1 ಲಕ್ಷಕ್ಕೂ ಮೇಲ್ಪಟ್ಟು ನಷ್ಟಪಡಿಸಿ ಬಾರ್ ಕೌಂಟರ್ ನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಕಾವೇಪ್ಪ, ಮಂಜು ಮತ್ತು ಎಂ.ಡಿ.ಮುದ್ದಪ್ಪರವರಿಗೆ ಪ್ರಾಣ ಬೆದರಿಕೆ ಹಾಕಿದ್ದು ಈ  ಬಗ್ಗೆ ಮಡಿಕೇರಿ ನಗರ ಠಾಣೆಯಲ್ಲಿ ಫಿರ್ಯಾದಿ ಮುದ್ದಪ್ಪನವರು ನೀಡಿದ ದೂರಿನ ಮೇರೆಗೆ ನಗರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಪಾದಚಾರಿಗೆ ಕಾರು ಡಿಕ್ಕಿ:

    ಪಾದಚಾರಿಯೊಬ್ಬರು ಮದುವೆ ಕಾರ್ಯಕ್ರಮ ಮುಗಿಸಿ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ ಕಾರೊಂದು ಡಿಕ್ಕಿಯಾಗಿ ಗಾಯಗೊಂಡ ಘಟನೆ ವಿರಾಜಪೇಟೆ ನಗರದ ಕಾವೇರಿ ಕಲ್ಯಾಣ ಮಂಟಪದ ಬಳಿ ಸಂಭವಿಸಿದೆ. ದಿನಾಂಕ 22-5-2017 ರಂದು ಕೇರಳದ ಕಲ್ಲಿಕೋಟೆ ನಿವಾಸಿ ಎಂ.ಅಜಿತ್ ಎಂಬವರು ತಮ್ಮ ತಂದೆ ಚಾಮಿ ಎಂಬವರೊಂದಿಗೆ ವಿರಾಜಪೇಟೆ ನಗರದ ಕಾವೇರಿ ಕಲ್ಯಾಣ ಮಂಟಪದಲ್ಲಿ ಮದುವೆ ಸಮಾರಂಭ ಮುಗಿಸಿ ನಗರದ ಕಡೆಗೆ ನಡೆದುಕೊಂಡು ಹೋಗುತ್ತಿದ್ದಾಗ ಎದುರುಗಡೆಯಿಂದ ಬಂದ ಕಾರೊಂದು ಚಾಮಿರವರ ಕಾಲಿನ ಮೇಲೆ ಹರಿದು ರಕ್ತ ಗಾಯವಾಗಿದ್ದು, ಈ ಸಂಬಂಧ ವಿರಾಜಪೇಟೆ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ಮುಂದಿನ ಕ್ರಮ ಜರುಗಿಸಿದ್ದಾರೆ.

ಬೈಕ್ ಕಳವು ಪ್ರಕರಣ ದಾಖಲು:

     ಮನೆಯ ಮುಂದೆ ನಿಲ್ಲಿಸಿದ್ದ ಮೊಟಾರ್ ಸೈಕಲ್ ಕಳ್ಳತನವಾದ ಘಟನೆ ಮಡಿಕೇರಿ ನಗರದ ಮಹದೇವಪೇಟೆ ಯಲ್ಲಿ ನಡೆದಿದೆ. ಮಡಿಕೇರಿ ನಗರದ ಮಹದೇವಪೇಟೆ ನಿವಾಸಿ ಜಿ.ಕೆ. ಅಮಿತ್ ಎಂಬವರು ದಿನಾಂಕ 7-7-2017 ರಂದು ತಮ್ಮ ಮನೆಯ ಮುಂದುಗಡೆ ನಿಲ್ಲಿಸಿದ್ದ ಕೆಎ-12 ಎಲ್-3006 ರ ಯಮಹಾ ಮೋಟರ್ ಸೈಕಲನ್ನು ಯಾರೋ ಕಳ್ಳರು ಕಳ್ಳತನ ಮಾಡಿಕೊಂಡು ಹೋಗಿದ್ದು ಈ ಸಂಬಂಧ ಮಡಿಕೇರಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಹಣ ನೀಡದ ಕಾರಣ ವ್ಯಕ್ತಿ ಮೇಲೆ ಹಲ್ಲೆ:

     ದಿನಾಂಕ 10-07-2017 ರಂದು ವಿರಾಜಪೇಟೆಯ ಮೀನುಪೇಟೆಯ ನಿವಾಸಿ ರವಿ ಎಂಬವರು ತಮ್ಮ ಪತ್ನಿ ಲತಾರವರೊಂದಿಗೆ ಸಮಯ 16-45 ಗಂಟೆಗೆ ವಿರಾಜಪೇಟೆ ನಗರದ ಎಲ್.ಐ.ಸಿ ಕಛೇರಿ ಮುಂದೆ ನಡೆದುಕೊಂಡು ಹೋಗುತ್ತಿದ್ದಾಗ ಅವರಿಗೆ  ಪರಿಚಯವಿರುವ ಪುಟ್ಟಸ್ವಾಮಿ ಎಂಬವರ ಮಗ ಅಭಿಶೇಕ್ ಎಂಬುವವನು 200 ರೂ.ಸಾಲ ಕೊಡುವಂತೆ ಕೇಳಿದ್ದು, ಹಣವಿಲ್ಲ ಎಂದು ಹೇಳಿದ ಕಾರಣಕ್ಕೆ ಅಭಿಶೇಕ್  ರವಿರವರ ದಾರಿ ತಡೆದು, ಕೈಯಿಂದ ಬುಜಕ್ಕೆ ಹೊಡೆದು ನಂತರ ರಸ್ತೆಯಲ್ಲಿ ಬಿದ್ದಿದ್ದ ಕಲ್ಲಿನಿಂದ ತಲೆಗೆ ಹಲ್ಲೆಮಾಡಿ ರಕ್ತ ಗಾಯಪಡಿಸಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಕೊಲೆ ಬೆದರಿಕೆ ಹಾಕಿರುವ ಬಗ್ಗೆ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಪೊಲೀಸರು ಪ್ರಕರಣ ದಾಖಲಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ. 

ಪರಸ್ಪರ ಬೈಕ್ ಗಳ ಡಿಕ್ಕಿ:

     ಎರಡು ಬೈಕ್ ಗಳ ನಡುವೆ ನಡೆದ ಅಪಘಾತದಲ್ಲಿ ಎರಡೂ ಬೈಕಿನ ಸವಾರರು ಗಾಯಗೊಂಡ ಘಟನೆ ಕುಶಾಲನಗರದ ಬಳಿಯ ಕೂಡುಮಂಗಳೂರು ಗ್ರಾಮದಲ್ಲಿ ನಡೆದಿದೆ. ದಿನಾಂಕ 9-7-2017 ರಂದು ರಾತ್ರಿ 10.45 ಗಂಟೆಗೆ ಜಯಪ್ರಕಾಶ್ ಎಂಬವವರು ತಮ್ಮ ಬಾಪ್ತು ಮೋಟಾರ್ ಸೈಕಲಿನಲ್ಲಿ ತಮ್ಮ ಮನೆಯ ಕಡೆಗೆ ಹೋಗುತ್ತಿದ್ದಾಗ ಕೂಡುಮಂಗಳೂರು ಮಾರ್ಗದ ರಾಜ್ಯ ಹೆದ್ದಾರಿಯಲ್ಲಿ ಹೋಗುವಾಗ ಆಟಲ್‌ ಬಿಹಾರಿ ವಸತಿಗೃಹದ ಮುಂದಿನ ತಿರುವಿನ ರಸ್ತೆಯಲ್ಲಿ ಹೋಗುವಾಗ ಎದುರುಗಡೆಯಿಂದ ಬಂದ ಪಲ್ಸರ್‌ ಬೈಕ್‌ನ ಚಾಲಕ ಅತಿವೇಗ ಮತ್ತು ಅಜಾಗರೂಕತೆಯಿಂದ ಚಾಲನೆ ಮಾಡಿಕೊಂಡು ಬಂದು ಡಿಕ್ಕಿಪಡಿಸಿದ ಪರಿಣಾಮ ಜಯಪ್ರಕಾಶ್ ರವರ ಬಲಕಾಲಿಗೆ ರಕ್ತಗಾಯವಾಗಿದ್ದು ಹಾಗೂ ಪಲ್ಸರ್ ಬೈಕ್‌ ಸವಾರನಿಗೂ ರಕ್ತಾಯವಾಗಿ ಎರಡು ಬೈಕ್‌ಗಳು ಜಕಂಗೊಂಡಿದ್ದು, ಈ ಸಂಬಂಧ ಕುಶಾಲನಗರ ಟ್ರಾಫಿಕ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ವ್ಯಕ್ತಿ ಆತ್ಮಹತ್ಯೆ

                               ದಿನಾಂಕ 09/07/2017ರಂದು ಸೋಮವಾರಪೇಟೆ ಬಳಿಯ ತಾಕೇರಿ ಗ್ರಾಮದ ನಿವಾಸಿ ಮಂಜುನಾಥ ಎಂಬವರು ಅವರ ಮನೆಯ ಬಳಿ ಇರುವ ದನದ ಕೊಟ್ಟಿಗೆಯ ಮಾಡಿನ ಕಬ್ಬಿಣದ ಪೈಪಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮೃತ ಮಂಜುನಾಥರವರು ಸೋಮವಾರಪೇಟೆಯ ಕೆನರಾ ಬ್ಯಾಂಕ್, ಮಡಿಕೇರಿಯ ಎಸ್‌ಬಿಐ ಬ್ಯಾಂಕ್ ಮತ್ತು ಇತರೆಡೆಗಳಲ್ಲಿ ವ್ಯವಸಾಯಕ್ಕಾಗಿ ಸಾಲ ಮಾಡಿದ್ದು ಬೆಳೆ ಸರಿಯಾಗಿ ಬಾರದ ಕಾರಣ ಸಾಲ ತೀರಿಸಲಾಗದೆ ಸುಸ್ತಿದಾರರಾಗಿದ್ದು ಈ ಬಗ್ಗೆ ನ್ಯಾಯಾಲಯದಲ್ಲಿ ದಾವೆ ಇರುವ ಕಾರಣಕ್ಕೆ ಬೇಸರಗೊಂಡು ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಅಕ್ರಮ ಮದ್ಯ ಮಾರಾಟ

                          ದಿನಾಂಕ 09/07/2017ರಂದು ಗೋಣಿಕೊಪ್ಪ ಠಾಣೆಯ ಪಿಎಸ್‌ಐ ಹೆಚ್‌.ವೈ.ರಾಜುರವರು ಗಸ್ತು ಕರ್ತವ್ಯದಲ್ಲಿದ್ದಾಗ ನಗರದ ಒಂದನೇ ವಿಭಾಗದಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿರುವುದಾಗಿ ದೊರೆತ ಖಚಿತ ಸುಳಿವಿನ ಮೇರೆಗೆ ಸ್ಥಳಕ್ಕೆ ತೆರಳಿದಾಗ ಗೋಣಿಕೊಪ್ಪ ನಗರದ ಬೈಪಾಸ್‌ ರಸ್ತೆ ನಿವಾಸಿ ಸುರೇಂದ್ರ ಎಂಬಾತನು ಯಾವುದೇ ಪರವಾನಗಿ ಇಲ್ಲದೆ ಅಕ್ರಮವಾಘಿ ಮದ್ಯವನ್ನು ಲೋಟದಲ್ಲಿ ಸುರಿದು  ಸಾರ್ವಜನಿಕರಿಗೆ ಮಾರಾಟ ಮಾಡುತ್ತಿರುವುದು ಪತ್ತೆಯಾಗಿದ್ದು ಪಿಎಸ್‌ಐರವರು ಆರೋಪಿ ಸುರೇಂದ್ರನನ್ನು ಬಂಧಿಸಿ ಸುಮಾರು ರೂ.300/- ಮೌಲ್ಯದ ಮದ್ಯದ ಪ್ಯಾಕೆಟುಗಳನ್ನು ವಶಪಡಿಸಿಕೊಂಡು ಗೋಣಿಕೊಪ್ಪ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಹಾವು ಕಚ್ಚಿ ಮಹಿಳೆ ಸಾವು

                           ದಿನಾಂಕ 15/06/2017ರಂದು ಮಡಿಕೇರಿಯ ಸಂಪಾಜೆ ಬಳಿಯ ಯು.ಚೆಂಬು ಗ್ರಾಮದ ನಿವಾಸಿ ಜಯಂತಿ ಎಂಬವರು ಅಡಿಕೆ ತೋಟದಲ್ಲಿ ಹುಲ್ಲು ಕಡಿಯುತ್ತಿರುವಾಗ ಯಾವುದೋ ಜಾತಿಯ ಹಾವೊಂದು ಕಡಿದು ಅಸ್ವಸ್ಥರಾದವರನ್ನು ಸುಳ್ಯದ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆಗಾಗಿ ದಾಖಲಿಸಿದ್ದು ದಿನಾಂಕ 09/07/2017ರಂದು ಚಿಕಿತ್ಸೆ ಫಲಕಾರಿಯಾಗದೆ ಮೃತರಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಅಕ್ರಮ ಮದ್ಯ ಮಾರಾಟ ಪತ್ತೆ

                        ದಿನಾಂಕ 09/07/2017ರಂದು ಪೊನ್ನಂಪೇಟೆ ಠಾಣೆಯ ಪಿಎಸ್‌ಐ ಎಸ್.ಎನ್.ಜಯರಾಂರವರವರಿಗೆ ತಿತಿಮತಿ ನೊಕ್ಯ ಗ್ರಾಮದಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿರುವ ಬಗ್ಗೆ ದೊರೆತ ಖಚಿತ ಸುಳಿವಿನ ಮೇರೆಗೆ ಸ್ಥಳಕ್ಕೆ ತೆರಳಿದಾಗ ತಿತಿಮತಿ ನಿಕ್ಯ ಗ್ರಾಮದ ಬಿ.ಸಿ.ಕೆ.ಎಸ್ಟೇಟಿನ ಲೈನ್‌ಮನೆಯೊಂದರಲ್ಲಿ ಕೆ.ಮಾದೇವ ಎಂಬಾತನು ಯಾವುದೇ ಪರವಾನಗಿ ಇಲ್ಲದೆ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿರುವುದು ಪತ್ತೆಯಾಗಿದ್ದು ಆರೋಪಿ ಮಾದೇವನ್ನು ಬಂಧಿಸಿ ಸುಮಾರು ರೂ.1100/- ಬೆಲೆಯ ಮದ್ಯವನ್ನು ವಶಪಡಿಸಿಕೊಂಡು ಪೊನ್ನಂಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಅಕ್ರಮ ಮದ್ಯ ಮಾರಾಟ

                              ದಿನಾಂಕ 09/07/2017ರಂದು ಸೋಮವಾರಪೇಟೆ ಬಳಿಯ ಅಬ್ಬೂರು ಕಟ್ಟೆ ಗ್ರಾಮದಲ್ಲಿ ಅಕ್ರಮವಾಘಿ ಮದ್ಯ ಮಾರಾಟ ಮಾಡುತ್ತಿರುವುದಾಗಿ ದೊರೆತ ಸುಳಿವಿನ ಮೇರೆಗೆ ಸೋಮವಾರಪೇಟೆ ಠಾಣೆಯ ಪಿಎಸ್‌ಐ ಎಂ.ಶಿವಣ್ಣರವರು ಸ್ಥಳಕ್ಕೆ ಭೇಟಿ ನೀಡಿದಾಗ ಅಬ್ಬೂರುಕಟ್ಟೆಯ ನಿವಾಸಿ ವಾಲ್ಟರ್ ಬುತೆಲ್ಲೋ ಎಂಬವರು ಅವರ ಅಂಗಡಿಯ ಮುಂದೆ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದುದು ಕಂಡು ಬಂದಿದ್ದು ಆರೋಪಿ ವಾಲ್ಟರ್ ಬುತೆಲ್ಲೋರವರನ್ನು ಬಂಧಿಸಿದ ಪಿಎಸ್‌ಐ ಎಂ.ಶಿವಣ್ಣರವರು ಆರೋಪಿಯು ಮಾರಾಟ ಮಾಡುತ್ತಿದ್ದ ವಿವಿಧ ಕಂಪೆನಿಯ ಮದ್ಯ ಹಾಗೂ ಸುಮಾರು ರೂ.1400/- ನಗರದನ್ನು ವಶಪಡಿಸಿಕೊಂಡು ಸೋಮವಾರಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ವ್ಯಕ್ತಿಯ ಆತ್ಮಹತ್ಯೆ 

                ವ್ಯಕ್ತಿಯೊಬ್ಬರು ಜೀವನದಲ್ಲಿ ಜುಗುಪ್ಸೆಗೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಚೆಟ್ಟಳ್ಳಿಯಲ್ಲಿ ವರದಿಯಾಗಿದೆ. ಚೆಟ್ಟಳ್ಳಿಯ ನಿವಾಸಿ ಚಂದ್ರರವರು ಕ್ಯಾನ್ಸರ್ ಖಾಯಿಲೆಯಿಂದ ಬಳಲುತ್ತಿದ್ದು ಇದೇ ವಿಚಾರದಲ್ಲಿ ಮನನೊಂದು ದಿನಾಂಕ 08-07-2017 ರಂದು ಮನೆಯಲ್ಲಿ ವಿಷ ಕುಡಿದು ಬ್ಲೇಡಿನಿಂದ ಕೈ ಮತ್ತು ಕುತ್ತಿಗೆ ಕುಯಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ಮಗ ಉಮೇಶರವರು ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ. 

ಅಕ್ರಮ ಪ್ರವೇಶ 

                  ದಿನಾಂಕ 08-07-2017 ರಂದು ಕುಶಾಲನಗರದ ಗ್ರೇಟ್ ಕಾಫಿ ಕ್ಯುರಿಂಗ್ ಕಾರ್ಖಾನೆಯಲ್ಲಿ ಪ್ರಕಾಶ ಎಂಬುವವರು ಇತರೊಂದಿಗೆ ಕೆಲಸ ಮಾಡುತ್ತಿರುವಾಗ ನಿಶಾಂತ್ ಕಾಫಿ ಕ್ಯೂರಿಂಗ್ ಕಾರ್ಖಾನೆಯ ಮಾಲಿಕ ಸುರೇಶ ಎಂಬುವವರು ಮೂರು ಜನರೊಂದಿಗೆ ಅಕ್ರಮ ಪ್ರವೇಶ ಮಾಡಿ ನಿನ್ನ ಸಾಹುಕಾರನ ಮಗ 18 ಲಕ್ಷ ಕೊಡಬೇಕಿದ್ದು ನೀವು ಹೊರ ಹೋಗಿ ಎಂದು ಹೇಳಿ ಎಲ್ಲರನ್ನೂ ಹೊರ ಹಾಕಿ ಕಾರ್ಖಾನೆಗೆ ಬೀಗ ಹಾಕಿರುವುದಾಗಿ ಪ್ರಕಾಶರವರು ನೀಡಿದ ದೂರಿನ ಮೇರೆಗೆ ಕುಶಾಲನಗರ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ. 

ಬಸ್ಸಿನಲ್ಲಿ ವ್ಯಕ್ತಿಯ ಮರಣ 

                      ದಿನಾಂಕ 08-07-2017 ರಂದು ತಿರುಮಲ ಬಸ್ಸಿಗೆ ಚಿಕ್ಕಮಂಡೂರುವಿನಿಂದ ಬೆಕ್ಕೆಸೊಡ್ಲೂರು ಗ್ರಾಮದ ನಿವಾಸಿ ಕಿಟ್ಟು ಎಂಬ ಮಧ್ಯವಯಸ್ಕ ವ್ಯಕ್ತಿ ಹತ್ತಿದ್ದು, ಬಸ್ಸಿನಲ್ಲಿ ಕುಳಿತ್ತಿದ್ದವರು ಬಿಕ್ಕಳಿಸುತ್ತಿದ್ದಾಗ ಬಸ್ಸಿನ ನಿರ್ವಾಹಕ ಅಪ್ಪಣ್ಣ ಎಂಬುವವರು ನೀರನ್ನು ಕುಡಿಸಿದಾಗ ನೀರನ್ನು ಕುಡಿಯದೇ ನೀರು ಹೊರಕ್ಕೆ ಬಂದಿದ್ದು, ಕಿಟ್ಟುರವರು ಬಸ್ಸಿನ ಒಳಗೇ ಮೃತಪಟ್ಟಿದ್ದು, ಈ ಬಗ್ಗೆ ನಿರ್ವಾಹಕ ಅಪ್ಪಣ್ಣ ರವರು ನೀಡಿದ ದೂರಿನ ಮೇರೆಗೆ ಶ್ರೀಮಂಗಲ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಹಲ್ಲೆ ಪ್ರಕರಣ 

                    ದಿನಾಂಕ 07-07-2017 ರಂದು ವಿರಾಜಪೇಟೆ ತಾಲೂಕಿನ ಕುಟ್ಟ ಬಸ್ಸು ನಿಲ್ದಾಣದಲ್ಲಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ಸಿನ ಚಾಲಕ ಮತ್ತು ನಿರ್ವಾಹಕ ಹಾಗೂ ಮಹಾಲಕ್ಷ್ಮಿ ಖಾಸಗಿ ಬಸ್ಸಿನ ಚಾಲಕ ಮತ್ತು ನಿರ್ವಾಹಕರು ಪರಸ್ಪರ ಹಲ್ಲೆ ನಡೆಸಿದ್ದು ಈ ಬಗ್ಗೆ ಉಭಯ ಕಡೆಯವರು ನೀಡಿದ ದೂರಿನ ಮೇರೆಗೆ ಕುಟ್ಟ ಠಾಣೆಯಲ್ಲಿ ಎರಡು ಪ್ರರಕಣ ದಾಖಲಾಗಿರುತ್ತದೆ. 

ಕೆರೆಗೆ ಬಿದ್ದು ವ್ಯಕ್ತಿಯ ದುರ್ಮರಣ 

              ವ್ಯಕ್ತಿಯೊಬ್ಬರು ಕೆರೆಯ ದಡದಲ್ಲಿ ಕೆಲಸ ಮಾಡುತ್ತಿರುವಾಗ ಕೆರೆಗೆ ಬಿದ್ದು ಮೃತಪಟ್ಟ ಘಟನೆ ವಿರಾಜಪೇಟೆ ತಾಲೂಕಿನ ಹಾತೂರು ಗ್ರಾಮದಲ್ಲಿ ವರದಿಯಾಗಿದೆ. ಗೋಣಿಕೊಪ್ಪಲುವಿನ ಹಾತೂರು ಗ್ರಾಮದ ನಿವಾಸಿ ಹರೀಶ್ ತಿಮ್ಮಯ್ಯ ಎಂಬುವವರು ಮೂರ್ಚೆ ರೋಗದಿಂದ ಬಳಲುತ್ತಿದ್ದು, ದಿನಾಂಕ 07-07-2017 ರಂದು ಹರೀಶ್ ತಮ್ಮಯ್ಯನವರು ಕೆರೆಯ ದಡದಲ್ಲಿ ಕೆಲಸ ಮಾಡುತ್ತಿರುವಾಗ ಮೂರ್ಚೆ ರೋಗ ಬಂದು ಕೆರೆಗೆ ಬಿದ್ದು ಮೃತಪಟ್ಟಿರುವುದಾಗಿ ಪೂಣಚ್ಚನವರು ನೀಡಿದ ದೂರಿನ ಮೇರೆಗೆ ಗೋಣಿಕೊಪ್ಪಲು ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ. 

ಕಾರು ಕಳವು 

                ಮನೆಯ ಮುಂದೆ ರಸ್ತೆಯಲ್ಲಿ ನಿಲ್ಲಿಸಿದ್ದ ಕಾರು ಕಳುವಾದ ಘಟನೆ ಮಡಿಕೇರಿಯ ರಾಜರಾಜೇಶ್ವರಿ ನಗರದಲ್ಲಿ ವರದಿಯಾಗಿದೆ. ರಾಜರಾಜೇಶ್ವರಿ ನಗರದ ನಿವಾಸಿ ಅಬುಬಕರ್ ಎಂಬುವವರು ದಿನಾಂಕ 05-07-2017 ರಂದು ತಮ್ಮ ಬಾಪ್ತು ಕೆಎ-04-ಪಿ-3514 ರ ಮಾರುತಿ 800 ಕಾರನ್ನು ಮನೆಯ ಮುಂದಿನ ರಸ್ತೆಯ ಪಕ್ಕದಲ್ಲಿ ನಿಲ್ಲಿಸಿದ್ದು ಮಾರನೆಯ ದಿನ ಬೆಳಿಗ್ಗೆ ನೋಡುವಾಗ ಕಾರನ್ನು ಯಾರೋ ಕಳವು ಮಾಡಿಕೊಂಡಿದ್ದು ಹೋಗಿದ್ದು, ಈ ಬಗ್ಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

 ಕರಿಮೆಣಸು ದುರುಪಯೋಗ ಪತ್ತೆ

ದಿಡೀರ್ ಶ್ರೀಮಂತನಾಗುವ ಆಸೆಯಿಂದ ಗೋದಾಮಿನಲ್ಲಿ ದಾಸ್ತಾನು ಇರಿಸಿದ್ದ ಕರಿಮೇಣಸನ್ನು  ಮಾರಿ ಶುಂಠಿ ಬೆಳೆಯಲು ಹೋಗಿ ನಷ್ಟ ಹೊಂದಿ ವಾಪಾಸು ಒಳ್ಳೆ ಮೆಣಸುಗಳನ್ನು ಹಿಂದಿರುಗಿಸಲಾಗದೇ ತಾನು ಕೆಲಸ ಮಾಡುತ್ತಿದ್ದ ಸೊಸ್ಶೆಟಿಗೆ 48 ಲಕ್ಷ ರೂಪಾಯಿ ನಷ್ಟ ಮಾಡಿದ ಪ್ರಕರಣವನ್ನು  ಕೊಡಗು ಜಿಲ್ಲಾ ಪೊಲೀಸರು ಪತ್ತೆ ಮಾಡುವಲ್ಲಿ ಯಶಸ್ವಿಯಾಗಿರುತ್ತಾರೆ.

ದಿನಾಂಕ 01/04/2017ರಂದು ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷರಾದ ಶ್ರೀ ಚೇರಂಡ ನಂದಾ ಸುಬ್ಬಯ್ಯ ರವರು ಮಾಲ್ದಾರೆ  ನಿವಾಸಿ ಮತ್ತು ಸೊಸ್ಶೆಟಿಯ ನೌಕರನಾದ ಮೈಕಲ್ ಎಂಬುವವರು ಗೋದಾಮಿನಲ್ಲಿಟ್ಟಿದ್ದ 104 ಚೀಲ ಕರಿಮೆಣಸನ್ನು ದುರುಪಯೋಗ ಪಡಿಸಿಕೊಂಡಿರುವುದಾಗಿ  ಸಿದ್ದಾಪುರ ಪೊಲೀಸ್ ಠಾಣೆಗೆ ನೀಡಿದ ದೂರಿನ ಮೇರೆ ಸಿದ್ದಾಪುರ ಪೊಲೀಸ್ ಠಾಣೆಯಲ್ಲಿ ಮೊ.ಸಂ. 42/2017 ಕಲಂ. 406, 420 ಐಪಿಸಿ ಪ್ರಕರಣ ದಾಖಲಾಗಿದ್ದು ಪ್ರಕರಣದ ತನಿಖೆಯನ್ನು ಕೈಗೊಳ್ಳಲಾಗಿತ್ತು.

ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಶ್ರೀ ಪಿ.ರಾಜೇಂದ್ರ ಪ್ರಸಾದ್‌, ಐಪಿಎಸ್‌ರವರು  ಈ ಪ್ರಕರಣದ ತನಿಖೆಯನ್ನು ನಡೆಸುವ ಬಗ್ಗೆ ಜಿಲ್ಲಾ ಅಪರಾಧ ಪತ್ತೆದಳಕ್ಕೆ ವಹಿಸಿದ್ದು ಪ್ರಕರಣದ ತನಿಖೆ ಕೈಗೊಂಡ  ಜಿಲ್ಲಾ ಅಪರಾಧ ಪತ್ತೆದಳದ ಪೊಲೀಸ್ ನಿರೀಕ್ಷಕರು ಆರೋಪಿ ಜೆ.ಮೈಕಲ್ ನ ಪತ್ತೆಯ ಬಗ್ಗೆ ತಂಡ ರಚಿಸಿಕೊಂಡು ಕ್ರಮ ಕೈಗೊಂಡಿದ್ದರು. ಪ್ರಕರಣದ ಆರೋಪಿಯ ಬಗ್ಗೆ ಮಾಹಿತಿ ಸಂಗ್ರಹಿಸಿದ ಜಿಲ್ಲಾ ಅಪರಾಧ ಪತ್ತೆ ದಳದ ತಂಡವು ದಿನಾಂಕ 06-07-2017ರಂದು ಸಂಜೆ ತಲೆಮರೆಸಿಕೊಂಡಿದ್ದ ಆರೋಪಿಯನ್ನು ಪಿರಿಯಾಪಟ್ಟಣದಲ್ಲಿ ಪತ್ತೆಹಚ್ಚಿ ವಶಕ್ಕೆ ಪಡೆದು  ಸೊಸ್ಶೆಟಿಯಲ್ಲಿ ದಾಸ್ತಾನು ಇರಿಸಿದ್ದ ಬಶೀರ್ ಮತ್ತು ಹೆಚ್.ಎಂ. ಶಿವ ಎಂಬವರಿಗೆ ಸೇರಿದ 48 ಲಕ್ಷ ಮೌಲ್ಯದ 7345 ಕೆ.ಜಿ ತೂಕದ 104 ಚೀಲ ಕರಿಮೆಣಸನ್ನು  ಆರೋಪಿಯಿಂದ ವಶಪಡಿಸಿಕೊಳ್ಳಲಾಗಿದೆ.

ಆರೋಪಿಯು ಪಿರಿಯಾಪಟ್ಟಣದ ಕಂಠಾಪುರದಲ್ಲಿ ಜಮಿನು ಗುತ್ತಿಗೆ ಪಡೆದು ಶುಂಠಿ ಬೆಳೆದಿದ್ದು ಶುಂಠಿ ವ್ಯವಸಾಯದಲ್ಲಿ ಲಕ್ಷಾಂತರ ರೂಪಾಯಿ ನಷ್ಟವಾದಾಗ  ಸಾಲ ಮರು ಪಾವತಿಸಲು ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ ಉತ್ತಮ ಬೆಲೆಯ ನಿರೀಕ್ಷೆಯಿಂದ ಬೆಳೆಗಾರರು ಮತ್ತು ವರ್ತಕರು ದಾಸ್ತಾನು ಇರಿಸಿದ್ದ ಸುಮಾರು 48ಲಕ್ಷ ಮೌಲ್ಯದ 7345ಕೆ.ಜಿ ತೂಕದ 104ಚೀಲ ಕರಿಮೆಣಸನ್ನು ಕದ್ದು ಮಾರಾಟ ಮಾಡಿರುವುದು ತನಿಖೆಯಿಂದ ತಿಳಿದುಬಂದಿರುತ್ತದೆ.

ಈ ಪ್ರಕರಣವನ್ನು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ  ಶ್ರೀ ರಾಜೇಂದ್ರ ಪ್ರಸಾದ್‌ರವರ ಐಪಿಎಸ್ ರವರ ಮಾರ್ಗದರ್ಶನದಲ್ಲಿ  ಡಿಸಿಐಬಿ ನಿರೀಕ್ಷಕರಾದ ಕರೀಂ ರಾವ್‌ತರ್ ರವರು ತಮ್ಮ ಸಿಬ್ಬಂದಿಗಳಾದ ಎ ಎಸ್ ಐ  ಹೆಚ್.ವೈ.ಹಮೀದ್, ಎನ್.ಟಿ. ತಮ್ಮಯ್ಯ,  ವಿ.ಜಿ.ವೆಂಕಟೇಶ್, ಕೆ.ಎಸ್.ಅನಿಲ್‌ ಕುಮಾರ್, ಎಂ.ಎನ್.ನಿರಂಜನ್, ಬಿ.ಎಲ್. ಯೊಗೇಶ್ ಕುಮಾರ್, ಕೆ.ಆರ್.ವಸಂತ, ಕೆ.ಎಸ್.ಶಶಿಕುಮಾರ್, ಯು.ಎ.ಮಹೇಶ್ರವರ ಪತ್ತೆಹಚ್ಚಲಾಗಿದ್ದು ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದ ಸಿಬ್ಬಂದಿಗಳ  ಕಾರ್ಯವೈಖರಿಯನ್ನು ಶ್ಲಾಘಿಸಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗಳು 10 ಸಾವಿರ ನಗದು ಬಹುಮಾನವನ್ನು ಘೋಷಿಸಿರುತ್ತಾರೆ.

ಅಕ್ರಮ ಮರಳು ಸಾಗಾಟ

               ದಿನಾಂಕ 06/07/2017ರಂದು ಶನಿವಾರಸಂತೆ ಠಾಣಾ ಪಿಎಸ್‌ಐ ಹೆಚ್‌.ಎಂ.ಮರಿಸ್ವಾಮಿರವರು ಗಸ್ತು ಕರ್ತವ್ಯದಲ್ಲಿರುವಾಗ ಮುಂಜಾನೆ 3:00 ಗಂಟೆಗೆ ಹಂಪಾಪುರ ಗ್ರಾಮದ ಸಾರ್ವಜನಿಕ ರಸ್ತೆಯಲ್ಲಿ  ಹಂಪಾಪುರ ನಿವಾಸಿ ಮಲ್ಲಪ್ಪ ಎಂಬವರು ಕೆಎ-12-ಬಿ-3970ರ ಟಿಪ್ಪರ್ ಲಾರಿಯಲ್ಲಿ ಅಕ್ರಮವಾಗಿ ಮರಳನ್ನು ಸಂಗ್ರಹಿಸಿ ಸಾಗಾಟ ಮಾಡಲು ನಿಲ್ಲಿಸಿದ್ದುದನ್ನು ಪತ್ತೆ ಹಚ್ಚಿ ಶನಿವಾರಸಂತೆ ಠಾಣೆಯಲ್ಲಿ ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಂಡಿರುತ್ತಾರೆ. 

ವ್ಯಕ್ತಿಯ ಮೇಲೆ ಹಲ್ಲೆ

                        ದಿನಾಂಕ 06/07/2017ರಂದು ಸೋಮವಾರಪೇಟೆ ಬಳಿಯ ಹೊಸಳ್ಳಿ ನಿವಾಸಿ ದಿಲೀಪ್‌ ಎಂಬವರು ಅವರ ಹಾಗೂ ಕೃಷ್ಣಪ್ಪ ಎಂಬವರ ನಡುವಿನ ವಿವಾದದ ಬಗ್ಗೆ ಊರಿನ ದೇವಸ್ಥಾನದಲ್ಲಿ ಏರ್ಪಾಡಾಗಿದ್ದ ಸಭೆಗೆ ಹೋಗುತ್ತಿದ್ದಾಗ ಕೃಷ್ಣಪ್ಪನವರು ದಾರಿ ತಡೆದು ಹಲ್ಲೆ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ. 

ಆಸ್ತಿ ವಿಚಾರ, ಹಲ್ಲೆ

                       ದಿನಾಂಕ 06/07/2017ರಂದು ವಿರಾಜಪೇಟೆ ಬಳಿಯ ಚೆಂಬೆಬೆಳ್ಳೂರು ನಿವಾಸಿ ಕೊಳುವಂಡ ಕಾರ್ಯಪ್ಪ ಎಂಬವರು ವಿರಾಜಪೇಟೆ ನಗರದ ಮೂರ್ನಾಡು ರಸ್ತೆಯಲ್ಲಿ ತಮ್ಮ ಧನು ಹಾಗೂ ಪತ್ನಿ ಸುಜಾತರವರೊಂದಿಗೆ ನಡೆದುಕೊಂಡು ಹೋಗುತ್ತಿರುವಾಗ ಕೊಳುವಂಡ ಮನೋಜ್, ಕೊಂಗೇರ ಮಿಲನ್, ಮಂಡೇಪಂಡ ರಾಜೇಶ್‌ ಮತ್ತು ಕೊಂಗೇರ ಕಾರ್ಯಪ್ಪ ಎಂಬವರುಗಳು ಸೇರಿಕೊಂಡು ಆಸ್ತಿ ವಿಚಾರವಾಗಿ ಕೊಳುವಂಡ ಕಾರ್ಯಪ್ಪನವರ ಜೊತೆಗೆ ಜಗಳವಾಡಿ ಕಲ್ಲಿನಿಂದ ಹಲ್ಲೆ ಮಾಡಿ ಕೊಲೆ ಬೆದರಿಕೆ ಹಾಕಿರುವುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ರಸ್ತೆ ಅಫಘಾತ

                     ದಿನಾಂಕ 06/07/2017ರಂದು ಮಂಡ್ಯ ಜಿಲ್ಲೆಯ ರಾಜೀವ್‌ ಎಂಬವರು ದಕ್ಷಿಣ ಕನ್ನಡ ಜಿಲ್ಲೆಯ ಸುಬ್ರಮಣ್ಯ ದೇವಸ್ಥಾನಕ್ಕೆ ಕೆಎ-03-ಎಡಿ-3104ರ ಕಾರಿನಲ್ಲಿ ಚಾಲಕ ಮಂಜುನಾಥ್ ಹಾಗೂ ಸ್ನೇಹಿತ ರಾಜಗೋಪಾಲ್‌ರವರೊಂದಿಗೆ ಹೋಗುತ್ತಿರುವಾಗ ದೇವರಕೊಲ್ಲಿ ಬಳಿ ರಸ್ತೆಯಲ್ಲಿ ಅಡ್ಡ ಬಂದ ನಾಯಿಯೊಂದನ್ನು ತಪ್ಪಿಸುವ ಸಂದರ್ಭ ಕಾರು ಚಾಲಕ ಮಂಜುನಾಥ್‌ರವರ ನಿಯಂತ್ರಣ ತಪ್ಪಿ ಕಾರು ರಸ್ತೆ ಬದಿಯ ವಿದ್ಯುತ್ ಕಂಬಕ್ಕೆ ಡಿಕ್ಕಿಯಾಗಿ ಹಾನಿಗೊಳಗಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.